Самка журавя зімавала ў Беларусі, каб не пакінуць самца

• 7.03.2026, 19:40

Кранальная гісторыя.

Яшчэ птушанём журавель з пашкоджаным крылом трапіў да жыхара Маладзечанскага раёна. Той яго падлячыў і пакінуў жыць у двары, бо лётаць журавель больш не змог, — распавядае гісторыю smartpress.by.

Два гады таму, калі пралятала зграя журавоў, журавель вітаў іх крыкамі — і адна з птушак спусцілася да яго. І засталася. Разам пара праводзіла шмат часу. Але восенню 2024‑га новая сяброўка далучылася да вялікай зграі і накіравалася на поўдзень на зімоўку.

Вясной 2025‑га птушка вярнулася да траўмаванага журавя. Пры сустрэчы яны выканалі некалькі танцаў. І на гэты раз спадарожніца журавя засталася на зімоўку з ім. Але хатняй не стала — калі журавель на ноч у маразы заходзіў у хлеў, яна заставалася на вуліцы на ахапку саломы. І гэта пры 30‑градусных маразах! А раніцай журавель хутчэй выбягаў да сваёй сяброўкі.

Сёлета вясной у двор прыляцела зграя з 12 журавоў. Гаспадар баяўся, што сяброўка яго падапечнага паляціць з імі. Але птушкі пераклікнуліся, паляцелі далей — а парачка засталася.