ЗША адправілі на Блізкі Усход «забойцаў» «Шахедаў»

• 7.03.2026, 22:33

Яны добра зарэкамендавалі сябе ва Украіне.

Армія ЗША тэрмінова адпраўляе на Блізкі Усход камплексы барацьбы з беспілотнікамі, правераныя ў баявых умовах ва Украіне. Іх мэта — супрацьдзеянне іранскім «Шахедам», паведамляе The Wall Street Journal.

Паводле слоў амерыканскіх чыноўнікаў, нявялікую колькасць камплексаў Merops з запасаў арміі ЗША ў Еўропе ўжо накіравалі на Блізкі Усход. Амерыканскі персанал будзе не толькі выкарыстоўваць гэтыя сістэмы, але і навучаць працы з імі іншых вайскоўцаў.

Адзін з амерыканскіх чыноўнікаў паведаміў журналістам, што Украіна, імаверна, прадаставіць інструктараў. У выданні нагадалі, што раней прэзідэнт Украіны Уладзімір Зяленскі казаў пра тое, што ЗША і іх рэгіянальныя саюзнікі звярнуліся да Кіева па дапамогу ў барацьбе з іранскімі дронамі.

Акрамя таго, журналісты адзначаюць, што баявы досвед Украіны выклікае цікавасць у Катара і іншых краін Персідскага заліва. Прадстаўнікі гэтых дзяржаў нядаўна наведалі Украіну, каб сустрэцца з украінскімі вытворцамі зброі.

У публікацыі таксама нагадваюць, што ў 2025 годзе ЗША і іх саюзнікі разгарнулі некалькі сістэм Merops у Польшчы і Румыніі пасля нападаў расійскіх беспілотнікаў. Гэты камплекс таксама атрымаў шырокае прымяненне сярод украінскіх вайскоўцаў.