Ці могуць беларусы пачынаць адпачынак з выхаднога дня

• 8.03.2026, 22:26

Адказ юрыста.

Беларусам патлумачылі, ці можна пайсці ў працоўны адпачынак, які паводле графіка пачынаецца з суботы або нядзелі.

На пытанне адказала прававы інспектар працы Магілёўскай абласной арганізацыі Беларускага прафсаюза работнікаў гандлю, спажывецкай кааперацыі і прадпрымальніцтва Алена Ільюшчанка. Пра гэта паведамляе партал mogilev.1prof.by.

У заканадаўстве няма нормы, якая вызначала б якія-небудзь асаблівыя ўмовы пачатку або заканчэння працоўнага адпачынку.

Атрымліваецца, што прамой забароны пачынаць яго з выхаднога дня няма.

«Працягласць адпачынкаў работнікаў вылічваецца ў каляндарных днях, пра што гаворыць ч. 1 арт. 151 Працоўнага кодэкса», — сказала юрыст.

Тым не менш на практыцы склалася традыцыя, згодна з якой адпачынак лепш пачынаць з працоўнага дня, а не з выхаднога.

Заканчэнне ж перыяду адпачынку наўпрост залежыць ад яго працягласці і можа прыходзіцца на любы дзень тыдня.

Алена Ільюшчанка нагадала, што ўсім работнікам гарантуюцца выхадныя дні (штотыднёвы бесперапынны адпачынак) у адпаведнасці з ч. 1 арт. 136 ПК. Пры пяцідзённым працоўным тыдні іх па два на кожны каляндарны тыдзень.

Наймальнік не мае права ў аднабаковым парадку настойваць на тым, каб работнік пачынаў працоўны адпачынак або яго частку менавіта з выхаднога, — падкрэсліла спецыяліст.

Але ёсць нюанс. Калі сам работнік выступіў з ініцыятывай пайсці ў адпачынак з суботы або нядзелі, наймальнік з гэтым пагадзіўся і ўсё ўнеслі ў графік, то такі адпачынак павінен быць прадастаўлены ў адпаведнасці з зацверджаным планам.