Прэм'ер Нідэрландаў: Вайна на Блізкім Усходзе не павінна адцягваць ад падтрымкі Украіны

• 9.03.2026, 6:32

Партнёры павінны працягваць аказваць падтрымку Кіеву.

Прэм'ер Нідэрландаў Роб Еттэн падкрэсліў, што партнёры павінны працягваць аказваць падтрымку Украіне, нягледзячы на павышаную ўвагу да вайны на Блізкім Усходзе.

Пра гэта Еттэн сказаў у нядзелю ў Кіеве на сумеснай прэс-канферэнцыі з прэзідэнтам Уладзімірам Зяленскім.

Еттэн заявіў пра неабходнасць «усім партнёрам працягваць ваенную падтрымку Украіны, не адцягваючыся на вайну на Блізкім Усходзе». «Так, вайна з Іранам працягваецца, але вайна ва Украіне таксама працягваецца», — патлумачыў прэм'ер Нідэрландаў.

Ён падкрэсліў: вельмі важна забяспечыць прадастаўленне Украіне адпаведнага ўзбраення, каб украінскія вайскоўцы маглі працягваць змагацца на полі бою за сваю краіну.

«І так, гэтая тэма падымалася не толькі ў размове са спадаром прэзідэнтам. На мінулым тыдні ў Бруселі былі размовы (пра гэта), у прыватнасці з нашымі саюзнікамі», — адзначыў Еттэн.