ЗША папярэдзілі польскага еўрадэпутата-лукашысца

• 9.03.2026, 11:26

Пасол ЗША ў Варшаве назваў яго ўчынак «агідным».

У пятніцу польскі еўрадэпутат і кіраўнік партыі «Канфедэрацыя польскай кароны» Гжэгаж Браўн, зацяты антысеміт і украінофоб, прыхільнік Пуціна і Лукашэнкі, падпісаў кнігу спачаванняў па аятале Алі Хаменеі, які загінуў на пачатку сакавіка ў выніку авіяўдару ЗША і Ізраіля. Для гэтага палітык наведаў пасольства Ірана ў Варшаве.

У подпісе да фотаздымкаў Браўн выказвае незадаволенасць аперацыяй «Эпічная ярасць» супраць Ірана. Ён лічыць яе «ганебнай». За гэта польскі еўрадэпутат атрымаў порцыю крытыкі ад пасла ЗША ў Польшчы Томаса Роўза, які назваў яго ўчынак «агідным». Дыпламат папярэдзіў, што Вашынгтон будзе памятаць стаўленне Браўна, як і любога іншага, хто падтрымлівае апанентаў ЗША.

«Амерыка і прэзідэнт ЗША не забудуць, хто з'яўляецца іх сябрамі, і, што яшчэ важней, хто імі не з'яўляецца», — напісаў Роўз на сваёй старонцы ў сацыяльнай сетцы X.