Вайна ў Іране стварыла для Украіны новыя магчымасці

• 9.03.2026, 14:54

Кіеў валодае найбольшым у свеце досведам барацьбы з беспілотнікамі.

Ваеннае супрацьстаянне паміж ЗША, Ізраілем і Іранам, што пачалося напрыканцы лютага, ужо ўплывае на сітуацыю вакол Украіны, якая працягвае вайну з Расіяй. Эксперты адзначаюць, што новы канфлікт можа адначасова ўскладніць абарону краіны і адкрыць для яе новыя магчымасці, піша CEPA (пераклад — сайт Charter97.org).

Адным з галоўных наступстваў можа стаць рост попыту на сістэмы супрацьракетнай абароны. Паводле слоў прэзідэнта Украіны Уладзіміра Зяленскага, за першыя тры дні баёў на Блізкім Усходзе было выкарыстана больш за 800 ракет-перахопнікаў комплексу Patriot. Гэта больш, чым Украіна атрымала ад заходніх партнёраў за некалькі гадоў вайны. У выніку канкурэнцыя за такія ракеты можа ўзмацніцца, што ўскладніць іх атрыманне для Кіева.

Пры гэтым Украіна валодае найбольшым у свеце досведам барацьбы з беспілотнікамі. Падчас расійскіх атак украінскія сілы рэгулярна адбіваюць масавыя налёты. Так, у ноч на 5 сакавіка Расія выпусціла 181 дрон і чатыры ракеты, з якіх каля 170 беспілотнікаў былі збітыя.

Менавіта гэты досвед выклікае цікавасць у партнёраў Кіева. Паводле слоў Зяленскага, Злучаныя Штаты і прынамсі адна краіна Персідскага заліва звярнуліся да Украіны па дапамогу ў супрацьдзеянні іранскім беспілотнікам, уключаючы дроны тыпу «Шахед». Можа ісці гаворка пра перадачу тэхналогій і ўдзел украінскіх спецыялістаў.

Адначасова краіны Блізкага Усходу, якія валодаюць значнымі фінансавымі рэсурсамі, могуць стаць патэнцыйнымі пакупнікамі ўкраінскіх сістэм супрацьдзеяння дронам. Зяленскі ўжо прапанаваў разгледзець абмен: пастаўкі Украіне ракет-перахопнікаў для комплексаў Patriot у абмен на ўкраінскія тэхналогіі перахопу беспілотнікаў.

Эксперты адзначаюць, што рынак сістэм абароны ад дронаў хутка расце, і за яго будуць канкурыраваць еўрапейскія і амерыканскія абаронныя кампаніі. Аднак баявы досвед Украіны робіць яе распрацоўкі асабліва запатрабаванымі.