У Таліне прадставяць кнігу «Беларусь Наталлі Радзінай»
- 9.03.2026, 15:44
Сустрэча адбудзецца 19 сакавіка.
У цэнтры Workland Vabaduse (Pärnu mnt 12) у Таліне прадставяць новую кнігу вядомага амерыканскага гісторыка і публіцыста Юрыя Фельштынскага «Беларусь Наталлі Радзінай: журналістка супраць дыктатара».
Прэзентацыя кнігі на беларускай, украінскай і рускай мовах адбудзецца 19 сакавіка, у чацвер, а 18:00.
У прэзентацыі прымуць удзел беларуская журналістка, галоўная рэдактарка сайта «Хартыя’97» Наталля Радзіна і вядомы журналіст, пісьменнік і валанцёр Аркадзь Бабчанка.
Кніга «Беларусь Наталлі Радзінай: журналістка супраць дыктатара» — гэта гісторыя сучаснай Беларусі, апісаная праз жыццё аднаго чалавека: беларускай журналісткі і палітычніцы Наталлі Радзінай, галоўнай рэдактаркі вядучага беларускага апазіцыйнага сайта «Хартыя’97» (Charter97.org).
Пасля прачытання гэтай кнігі чытач стане сведкам рэвалюцыйных падзей і пратэстнага руху, якія пачаліся ў Беларусі ў 1995 годзе і не згасаюць да сёння, азнаёміцца з летапісам шматлікіх палітычных забойстваў, здзейсненых беларускімі спецслужбамі па загадзе дыктатара Лукашэнкі, разам з Радзінай акунецца ў яе турэмныя будні, адчуе радасць яе вызвалення і складанасці яе ўнікальных уцёкаў ад КДБ з Беларусі, стане сведкам яскравых і незабыўных сустрэч з такімі вядомымі сучаснікамі, як Станіслаў Шушкевіч, Лех Валэнса, Анджэй Вайда, Барыс Нямцоў, Леанід Невзлін, Гілары Клінтан і іншымі.
Чытач убачыць, што Беларусь, хоць і была часткай Расійскай імперыі і СССР, з’яўляецца асобнай самабытнай краінай; што з сярэднявечча Беларусь лічыла сябе часткай Еўропы і арыентавалася на Захад, а зусім не на Усход; што будучыня Беларусі, якая вызвалілася ад дыктатарскага рэжыму Лукашэнкі, — з Еўрапейскім саюзам, а не з Расіяй, якая фактычна акупавала Беларусь, бяспека якой урэшце можа быць забяспечана толькі сяброўствам у НАТА.
Але галоўная выснова, якую можа зрабіць чытач, у тым, што, нягледзячы на часовыя паразы і пралітую кроў, арышты і смяротныя пакаранні апошніх дзесяцігоддзяў, адсутнасць рэальнай дапамогі звонку, беларуская дэмакратыя жывая, а беларусы працягваюць змагацца за свабоду.
Кніга будзе цікавая не толькі гісторыкам, журналістам і палітолагам, якія вывучаюць Беларусь, але і шырокаму колу чытачоў.
Прэзентацыя адбудзецца 19 сакавіка, у чацвер, а 18:00
Адрас: Талін, цэнтр Workland Vabaduse, Pärnu mnt 12