Польскія СМІ: Лукашэнка ваюе з выдуманай дзяржавай

• 9.03.2026, 18:56

Абсурд у Мінску.

Беларускія ўлады ўнеслі Вейшнорыю — створаную для ваенных вучэнняў фіктыўную дзяржаву — у спіс «экстрэмісцкіх фармаванняў». Рашэнне было прынята Міністэрствам унутраных спраў. Гэта азначае, што кожны, хто мае дачыненне да праекта, можа быць прыцягнуты да крымінальнай адказнасці, уключаючы пазбаўленне волі на тэрмін да сямі гадоў. На практыцы рашэнне дазваляе пераследаваць у судовым парадку анлайн-дзейнасць, звязаную з ініцыятывай, якая насіла сатырычны характар і не мела рэальнай арганізацыйнай структуры, піша польскае выданне Do Rzeczy у артыкуле пад назвай «Абсурд у Мінску. Лукашэнка ваюе з дзяржавай, якую сам жа стварыў».

Звязаных з Вейшнорыяй актывістаў ужо прызналі экстрэмісцамі, піша іншы польскі партал interia.pl. Сярод затрыманых — Алег Ларычаў — вулічны мастак, грамадскі дзеяч і арганізатар фестывалю «Гарадскія міфы», раней узнагароджаны ўладамі за сваю працу. У студзені ён быў арыштаваны і прызнаны беларускімі праваабарончымі арганізацыямі палітычным зняволеным.

Вейшнорыя з’явілася ў 2017 годзе ў межах сцэнара вучэнняў «Захад-2017». У ходзе вучэнняў яна была прадстаўлена як варожае ўтварэнне на захадзе Беларусі, якое ўключае, між іншым, Гродзенскую вобласць і часткі Мінскай і Віцебскай абласцей. Сцэнар прадугледжваў, што Захад імкнецца аддзяліць гэтую частку краіны і стварыць там новую дзяржаву.

Пасля абвяшчэння мэтаў праекта ён практычна імгненна быў падхоплены карыстальнікамі інтэрнэту. У сеціве пачалі з’яўляцца сатырычныя «дзяржаўныя ўстановы», сімвалічныя пашпарты, а таксама сцяг і герб, натхнёныя гістарычнай беларускай сімволікай.

Гэта з’ява мела мемападобны і іранічны характар. Ніякай палітычнай партыі, падпольнай арганізацыі або сепаратысцкага руху не ўзнікла. «Вейшнорыя» функцыянавала выключна як анлайн-сатыра, заснаваная на выдуманым ваенным сцэнары.