Лукашэнка павіншаваў з абраннем новага вярхоўнага лідара Ірана

• 9.03.2026, 19:53

Дыктатар пажадаў Маджтабе Хаменеі «здароўя, мудрасці і поспехаў у яго місіі».

Аляксандр Лукашэнка 9 сакавіка «ад імя суайчыннікаў і сябе асабіста» павіншаваў Маджтабу Хусейні Хаменеі з абраннем на пасаду вярхоўнага лідара Ірана, якую раней займаў яго пакойны бацька.

У віншаванні гаворыцца, што «Іран па праве займае асаблівае месца ў гісторыі і цывілізацыйнай спадчыне чалавецтва», а «вернасць іранскага народа традыцыям, стойкасць перад любымі выпрабаваннямі і імкненне да самастойнага развіцця выклікаюць шчырую павагу і прызнанне».

«Вы ўзначалілі краіну ў выключна складаны момант. Нягледзячы на гэта, упэўнены, што пад вашым кіраўніцтвам Іран працягне ісці шляхам адстойвання незалежнасці, забеспячэння стабільнага росту, захавання духоўнай спадчыны і ўмацавання сваёй ролі на міжнароднай арэне. Гэта стане найлепшай данінай памяці вашым бацькам, родным і блізкім, а таксама ўсім іранцам, якія цяпер аддаюць жыцці дзеля абароны Айчыны», — заявіў Лукашэнка.

Ён запэўніў, што ў Мінску «высока цэняць адносіны партнёрства з Тэгеранам і надаюць вялікае значэнне далейшаму пашырэнню кантактаў на ўсіх узроўнях», пажадаў Маджтабе Хаменеі «здароўя, мудрасці і поспехаў у яго місіі», а народу Ірана — «міру, мужнасці і адзінства».