Адна з краін Персідскага заліва рыхтуецца дапамагчы ЗША сілай адкрыць Армузскі праліў

• 1.04.2026, 9:48

Гэта можа быць першы выпадак у гісторыі.

Аб'яднаныя Арабскія Эміраты рыхтуюцца дапамагчы ЗША сілай адкрыць Армузскі праліў. Гэта можа стаць першым выпадкам, калі краіна Персідскага заліва стане ўдзельніцай баявых дзеянняў у адказ на атакі Ірана.

Пра гэта паведамляе Wall Street Journal.

Выданне цытуе неназваных арабскіх чыноўнікаў, якія заявілі, што ААЭ лабіруюць рэзалюцыю Савета Бяспекі ААН, якая дазволіла б такія дзеянні.

Эмірацкія дыпламаты заклікалі ЗША і вайсковыя сілы ў Еўропе і Азіі сфармаваць кааліцыю для адкрыцця праліва сілай, паведамілі чыноўнікі.

Прадстаўнік ААЭ заявіў, што іранскі рэжым лічыць, што «змагаецца за сваё існаванне і гатовы задушыць сусветную эканоміку праз блакаду праліва».

Ён таксама адзначыў, што краіна актыўна вывучае магчымасці свайго ваеннага ўдзелу ў забеспячэнні бяспекі праліва, у прыватнасці намаганні па размінаванні і прадастаўленні іншых паслуг забеспячэння.

Пры гэтым нават у выпадку правалу галасавання Эміраты гатовыя далучыцца да ваенных намаганняў, адзначаюць крыніцы.

У МЗС ААЭ заявілі, што існуе «шырокі глабальны кансенсус, што свабода навігацыі ў Армузскім праліве павінна быць захавана».

Паводле слоў некаторых арабскіх чыноўнікаў, ААЭ заклікаюць ЗША акупаваць выспы на гэтым стратэгічным вадным шляху. У прыватнасці, востраў Абу-Муса, які Іран утрымлівае ўжо паўстагоддзя і на які прэтэндуюць Эміраты.

Саудаўская Аравія і іншыя дзяржавы Заліва цяпер настроеныя супраць іранскага рэжыму і хочуць, каб вайна працягвалася да таго часу, пакуль ён не будзе знешкоджаны або звяргнуты.

Да пачатку вайны ААЭ разглядалі Іран як складанага суседа, палітычныя пазіцыі якога ўсё ж паддаваліся пэўнай логіцы. Але з 28 лютага рэжым паказаў сваё сапраўднае аблічча.

У той жа час удзел Эміратаў у патэнцыйнай аперацыі нясе значныя рызыкі, паколькі можа прывесці да доўгатэрміновай напружанасці з Іранам.

На гэтым фоне Тэгеран ужо адрэагаваў узмацненнем атак па тэрыторыі ААЭ.

За апошнія дні інтэнсіўнасць ракетных і беспілотных удараў рэзка ўзрасла — у прыватнасці, было выпушчана каля 50 балістычных і крылатых ракет і беспілотнікаў.

Іран таксама папярэдзіў, што будзе знішчаць крытычную інфраструктуру любой краіны Персідскага заліва, якая падтрымае сілавую аперацыю, наўпрост згадаўшы ААЭ.