«Раснафта» паведаміла пра чатырохразовы абвал прыбытку
- 1.04.2026, 18:16
Расійская нафтавая галіна апынулася ў эпіцэнтры «ідэальнага штарму».
«Раснафта» — найбуйнейшая здабыўная кампанія Расіі, на якую прыпадае кожны другі здабыты з нетраў барэль, — па выніках 2025 года сутыкнулася са скарачэннем чыстага прыбытку амаль у 4 разы, перадае The Moscow Times.
Згодна са справаздачнасцю па МСФС, летась кампанія зарабіла 293 млрд расійскіх рублёў супраць 1,084 трлн годам раней. У чацвёртым квартале прыбытак «Раснафты» абваліўся ў 10 разоў — 16 млрд рублёў супраць 158 млрд у верасні–снежні 2024 года. Пры гэтым спад прыбытку паскараецца: у першым квартале гэта было 170 млрд рублёў, у другім — 74 млрд, у трэцім — 32 млрд.
Вынікі «Раснафты» — «слабыя», пішуць аналітыкі Альфа-банка. Па выніках года выручка кампаніі скарацілася на 19% (да 8,236 трлн рублёў), паказчык EBITDA — на 28% (да 2,173 трлн рублёў), а свабодны грашовы паток — гэта значыць розніца паміж паступленнямі на рахункі і адтокам — удвая, да 700 млрд рублёў.
«У 2025 годзе расійская нафтавая галіна апынулася ў эпіцэнтры «ідэальнага штарму», — паскардзіўся, каментуючы вынікі, кіраўнік «Раснафты» Ігар Сечын. Падзенне цэн на нафту, пашырэнне дысконтаў, абмежаванне здабычы ў межах пагаднення АПЕК+, прывялі да скарачэння выручкі «Раснафты», а высокая ключавая стаўка Цэнтрабанка і павышэнне падаткаў — ударылі па прыбытку, патлумачыў Сечын.
«Дадатковы ціск аказалі блакуючыя санкцыі ЗША супраць «Раснафты», а таксама ўмацаванне рубля на фоне патаннелай нафты», — адзначае Наталля Мільчакова, вядучы аналітык Freedom Finance Global. Напрыканцы года, пасля ўзмацнення санкцый, цана барэля сарту Urals апусцілася да $40 і ніжэй, а каля паловы радовішчаў у РФ сталі стратнымі.
У адказ нафтавікі былі вымушаныя скарачаць здабычу, і па выніках года яе аб’ёмы ўпалі да мінімуму за 16 гадоў — 512 млн тон. Здабыча «Раснафты», згодна са справаздачнасцю, скарацілася на 2%, да 181,1 млн тон.
Праблемы нафтавай галіны звязаны з санкцыямі, скардзіцца Сечын у рэлізе: у «чорныя спісы» ўносяцца суда ценявога флоту, фіксуюцца масавыя адмовы страхоўваць перавозкі расійскай нафты, а стаўкі фрахту ўзляцелі ў 10 і больш разоў. Цяпер фрахт танкера для пастаўкі ў Індыю абыходзіцца ў $20 за барэль нафты на яго борце, а да 2022 года, пры экспарце ў Еўропу, гэта было ўсяго $2 за барэль, прыводзіць лічбы кіраўнік «Раснафты».
З сярэдзіны 2025 года «Раснафта» перастала раскрываць у справаздачнасці даныя па грашовых патоках. Ідзе гаворка пра лічбы, якія адлюстроўваюць паступленні на рахункі кампаніі (аперацыйны грашовы паток), адток з рахункаў на інвестыцыі і фінансавыя выдаткі, а таксама змены запасаў наяўных грашовых сродкаў на рахунках («грашовыя сродкі і іх эквіваленты»).
Тым не менш, са справаздачнасці вынікае, што ў другім паўгоддзі рахункі «Раснафты» папоўніліся на 500 млрд рублёў, што «забяспечыла кампанію ліквіднасцю», звяртае ўвагу Альфа-банк. Прыток на рахункі «Раснафта» зафіксавала неўзабаве пасля таго, як засакрэціла падрабязныя даныя.