Украіна дамовілася з ЗША ўзмацніць дакумент аб гарантыях бяспекі

• 1.04.2026, 20:33

Зяленскі падзяліўся падрабязнасцямі.

Прэзідэнт Украіны Уладзімір Зяленскі заявіў, што ў сераду, 1 красавіка, размаўляў з амерыканскімі перамоўнікамі Стывам Уіткафам і Джарэдам Кушнерам, сенатарам Ліндсі Грэмам і генеральным сакратаром НАТА Маркам Рутэ аб умацаванні дыпламатыі, гарантыях бяспекі і прыцягненні еўрапейцаў.

Пра гэта ён паведаміў падчас вячэрняга відэазвароту.

Паводле слоў кіраўніка дзяржавы, размова была станоўчай. Прэзідэнт кажа, што бакі дамовіліся ўзмацніць гарантыі бяспекі для Украіны.

Акрамя таго, Зяленскі даручыў украінскай камандзе абнавіць дакументы.

«Мы бачым, якія змены ў свеце. Як шмат можа змяніцца за адзін момант. Гэта датычыцца і альянсаў, і выклікаў бяспекі. Украіна павінна атрымаць надзейную бяспеку, і гэта галоўная задача. Ключ у тым, як і пра што мы ўсе разам гаворым з Расіяй. І ў тым, як падрыхтаваныя дакументы, у тым ліку аб гарантыях бяспекі. Каб украінцы дакладна разумелі, як партнёры будуць рэагаваць у выпадку паўтарэння расійскай агрэсіі і што, уласна, будзе стрымліваць Расію ад агрэсіі», — сказаў ён.

Прэзідэнт кажа, што патрэбныя агульныя моцныя пазіцыі, і ўкраінскі ўнёсак у гэтую сілу дакладна ёсць. Зяленскі разлічвае, што каманды ў бліжэйшы час прадметна папрацуюць, «каб мы ўсе змаглі адчуць прагрэс».

Таксама ён адзначыў важнасць трохбаковага фармату і сустрэчы на ўзроўні лідараў.