Гасцей мінскай кавярні просяць сыходзіць, калі яны бяруць каву з сабой
- 1.04.2026, 21:18
У сацыяльных сетках разгарэлася спрэчка.
У Threads завірусіўся пост з апісаннем сітуацыі ў адной з мінскіх кавярань. Аўтар расказаў, што замовіў каву з сабой, а пасля прыгатавання напою яго папрасілі выйсці з завядзення. Усё з-за фармату замовы — на вынас. Пост за дзень сабраў больш за 30 тысяч праглядаў і каля сотні каментарыяў, перадае «Онлайнер».
«Цэны ў завядзенні і на вынас нібы аднолькавыя, амаль усе столікі свабодныя. Сапраўды цікава даведацца, у чым сэнс такой жорсткай сегрэгацыі гасцей», — адзначыў малады чалавек.
За каментарыем журналісты звярнуліся ў тую самую кавярню UGL, якая знаходзіцца на Гарадскім вале.
— Мы нікога ніколі не выганялі. Наша палітыка скіраваная на максімальнае скарачэнне спажывання аднаразовай пасуды. І экалагічнасць як смаку, так і спосабу ўжывання.
А ўнутры завядзення лічым гэта часткай павагі да культуры. Мы закладалі гэтыя стандарты і з павагай іх тлумачым. Мы заўсёды ўдакладняем і, калі госць кажа, што яму трэба сыходзіць, барыста імгненна пералівае напой [у аднаразовую пасуду]. Спадзяёмся на разуменне і ўзаемную павагу, — адказалі журналістам у завядзенні.
Дарэчы, ужо пасля з'яўлення поста ў Threads эксперымент у кавярні вырашыла правесці барыста па імені Аліса — і вось што з гэтага атрымалася.
Дзяўчыне прапанавалі выпіць каву з пасуды, якая стварае «асаблівы вайб». Ідзе гаворка пра керамічныя кубкі, што нагадваюць змятыя пластыкавыя стаканчыкі. Але пры гэтым магчымасць узяць каву з сабой у аднаразовай пасудзе таксама ёсць.
Меркаванні каментатараў традыцыйна падзяліліся. Хтосьці катэгарычна адмаўляецца прыняць такую канцэпцыю, а хтосьці не ўбачыў у ёй нічога страшнага. Тым больш такі прынцып нярэдка сустракаецца ў іншых краінах.
«Калі б было „на месцы“, то ён [барыста] яшчэ і дзверы на ключ зачыніў бы, пакуль не дап'яце сваю каву».
«Я б не сыходзіла. Я б сядзела».
«У іх там стаіць спецыяльная праграма ўліку замоваў, і барыста ў ёй усё адзначае, то бок калі ў праграме пазначана „на вынас“, то прыбіранне стала не прадугледжана, а крошкі і пусты стакан застануцца».
«Сутыкнулася з такой жа сітуацыяй. Заўсёды бяру вялікую каву і пры заказе ўдакладняю, што буду „на месцы“, але каву хацелася б у стаканчык з сабой. Мне адмовілі. Окей, прысела на 15 хвілін, і давялося пакінуць недапіты напой і сыходзіць».
«Апусцім той факт, што камусьці падабаецца піць каву з папяровага стаканчыка і аблізваць пластыкавыя крышачкі. Вярнёмся да галоўнага: фармат „сядзець у завядзенні з аднаразовай пасудай“ — гэта гісторыя пра фастфуд-сеткі. Кава ≠ фастфуд. Тым больш калі ёсць кухня і сэрвіс».
«Растлумачце мне, калі ласка, чаму некаторыя замаўляюць напой у папяровым (насамрэч, напалову пластыкавым) кубку, калі сядзяць унутры? Гэта нейкі наўмысны антыэкалагічны акт?»