Украіна і Расія абмяняліся целамі ваеннаслужачых

• 10.04.2026, 2:59

Абмен адбываўся на тэрыторыі Беларусі.

Абмен целамі загінулых паміж Расіяй і Украінай адбыўся ў пункце пропуску Новая Гута (з украінскага боку — Новыя Ярылавічы), паведамляе тэлеграм-канал Гомельскага аблвыканкама «Гомельшчына афіцыйна».

Паводле слоў намесніка старшыні аблвыканкама Андрэя Бараноўскага, «праводзіцца вялікая праца: выбудоўваюцца лагістычныя ланцужкі, каб арганізаваць і забяспечыць бяспечныя ўмовы для правядзення абменаў».

У найбліжэйшы час, гаворыцца ў паведамленні, на беларуска-ўкраінскай мяжы «адбудзецца яшчэ адзін абмен».

У тэлеграм-канале Каардынацыйнага штаба па пытаннях звароту з ваеннапалоннымі (Украіна) паведамляецца, што ў краіну вернутыя целы тысячы загінулых: «Пасля экспертызы па ўстанаўленні асобы кожнага іх целы будуць перададзеныя сваякам для годных пахаванняў».