ЗСУ паразілі ключавы расійскі нафтаправод

• 10.04.2026, 12:56

Ён дастаўляе нафту ў Наварасійск.

У ноч на 10 красавіка дроны атакавалі стратэгічныя аб’екты ў Валгаградскай вобласці Расіі. Пад удар мог трапіць магістральны нафтаправод «Валгаград — Ціхарэцк», піша «Дыялог».

Губернатар Валгаградскай вобласці Андрэй Бачараў прызнаў, што стратэгічныя аб’екты рэгіёна сёння атакавалі БПЛА. Паводле яго слоў, гэта была масіраваная атака беспілотнікаў. Ён заявіў, што ў Светлаярскім раёне пашкоджана ёмістасць з нафтапрадуктамі, у выніку чаго пачаўся пажар. У Суравікінскім раёне пашкоджаны газаправод.

У зводцы Мінабароны РФ гаворыцца, што ў ноч на 10 красавіка расійская СПА над тэрыторыяй Валгаградскай вобласці нібыта збіла 57 украінскіх БПЛА самалётнага тыпу. Усяго ж гэтай ноччу расійская СПА над тэрыторыяй Расіі нібыта збіла 151 украінскі дрон.

OSINT-аналітыкі лічаць, што сёння ўначы ў Растоўскай вобласці пашкоджаны магістральны нафтаправод «Валгаград — Ціхарэцк», па якім расійскую нафту транспартуюць у Наварасійск для пагрузкі на марскі транспарт, каб потым адпраўляць яе на экспарт. Грошы, атрыманыя ад продажу нафты, Крэмль накіроўвае на працяг вайны супраць Украіны, таму МНПП «Валгаград — Ціхарэцк» з’яўляецца законнай мэтай для ЗСУ.

ЗСУ раней неаднаразова атакавалі ў Наварасійску нафтавы тэрмінал «Шэсхарыс», праз які штодзённа на экспарт адпраўляюць да 700 тысяч барэляў расійскай нафты. У красавіку гэты тэрмінал праз сур’ёзныя пашкоджанні быў вымушаны цалкам спыніць працу.