У расійскім Уладзікаўказе адбыўся моцны выбух

• 10.04.2026, 15:09

Ёсць загінулыя.

Двое чалавек загінулі, больш за 10 атрымалі раненні ў выніку выбуху ў расійскім Уладзікаўказе 10 красавіка. Такія апошнія даныя МНС. Выбух адбыўся на складзе, размешчаным у жылым раёне. Паводле папярэдніх звестак, на складзе захоўвалася піратэхніка, паведамляе «Радыё Свабода».

Целы загінулых дасталі з-пад завалаў, паведамілі ў МНС. Двое чалавек, як паведамляецца, былі выратаваныя. Пошукава-выратавальная аперацыя працягваецца, колькі людзей можа заставацца пад заваламі, не паведамляецца.

Колькасць пацярпелых павялічылася да 14, сярод іх двое дзяцей, усе яны шпіталізаваныя. Чацвёра чалавек, як паведамляецца, знаходзяцца ў надзвычай цяжкім стане.

Супрацоўнікі МНС цяпер спрабуюць патушыць пажар, з-за якога існуе пагроза далейшай дэтанацыі. Эвакуявалі студэнтаў медыцынскага факультэта, які размешчаны побач са складамі.