Дзяржаўныя органы Францыі перайдуць з Windows на Linux

• 10.04.2026, 18:07

Пытанне лічбавага суверэнітэту актыўна абмяркоўваецца ў Францыі з пачатку года.

У межах маштабнага ўрадавага плана па забеспячэнні лічбавага суверэнітэту дзяржаўныя органы ў Францыі перайдуць з АС Windows на Linux, піша Les Numeriques са спасылкай на ўлады. Дзяржаўным установам таксама рэкамендуецца замяніць сэрвіс відэаканферэнцый Google Meet на французскі аналаг.

«Лічбавую трансфармацыю» найперш правядуць Міжведамаснае ўпраўленне па лічбавых пытаннях (DINUM), Галоўнае ўпраўленне прадпрыемстваў (DGE, падраздзяленне Міністэрства эканомікі, якое адказвае за інавацыі і развіццё канкурэнцыі), Нацыянальнае агенцтва кібербяспекі (ANSSI) і Упраўленне дзяржаўных закупак (DAE) Францыі. Да восені планы адмовы ад амерыканскага праграмнага забеспячэння павінны прадставіць усе астатнія міністэрствы.

Пытанне лічбавага суверэнітэту актыўна абмяркоўваецца ў Францыі з пачатку года. Урад абвясціў пра «паскарэнне рэалізацыі планаў па скарачэнні лічбавай залежнасці ад неэўрапейскіх краін» з-за асцярог, што ЗША могуць абмежаваць у Еўропе доступ да некаторых сваіх тэхналогій.