«Затрымліваюць усіх, каго ўчора не было»

• 10.04.2026, 19:27

Сілавікі зноў прыйшлі ў офіс ZROBIM architects.

У мінскім офісе вядомай архітэктурнай студыі ZROBIM architects другі дзень запар працуюць сілавікі. Паводле інфармацыі «Зеркала», 10 красавіка там зноў адбываюцца затрыманні. На працоўныя месцы выклікалі ўсіх супрацоўнікаў, у тым ліку тых, каго не было падчас першага візіту сілавікоў.

Як распавёў «Зеркалу» крыніца, знаёмая з сітуацыяй, раніцай 10 красавіка ў мінскі офіс ZROBIM architects зноў прыходзілі сілавікі. Паводле яго слоў, як і напярэдадні, следчыя дзеянні праводзілі супрацоўнікі Дэпартамента фінансавых расследаванняў.

Суразмоўца паведаміў, што большасць з прыблізна 50 супрацоўнікаў, затрыманых 9 красавіка, былі адпушчаныя. Аднак заснавальнік кампаніі Андрэй Макоўскі (Андрусь Bezdar), паводле папярэдніх звестак, застаецца пад вартай. Другі саўладальнік студыі, Аляксей Караблеў, знаходзіцца ў ЗША.

— Затрымліваюць усіх, каго ўчора не было на працоўных месцах. Сёння сказалі ўсім выйсці ў офіс, — дадаў наш суразмоўца.

Хто менавіта аддаў такое распараджэнне, яму невядома.

Нагадаем, раніцай 9 красавіка сілавікі прыйшлі ў мінскі офіс ZROBIM architects. Як паведамлялі «Зеркалу» дзве не звязаныя паміж сабой крыніцы, былі затрыманыя ўсе супрацоўнікі, што знаходзіліся на месцы, — каля 50 чалавек. Таксама быў недаступны працоўны сервер кампаніі.

Афіцыйна прычыны цікавасці сілавікоў да адной з самых паспяховых архітэктурных студый Беларусі дагэтуль не агучаныя. Увечары адзін з блізкіх да сілавікоў тэлеграм-каналаў звязаў затрыманні з допісам заснавальніка кампаніі Андрэя Макоўскага ў сацсетцы Threads.

Напачатку сакавіка прадпрымальнік расказаў, што ў кампанію прыйшоў ліст ад дзяржорганаў з патрабаваннем узяць у штат ідэолага. Прапагандысты расцанілі гэты допіс як незадаволенасць.

«Ну і вынік сябе чакаць не прымусіў. Проста там, дзе няма ідэолагаў, — змагарства пачынае расці, як цвіль, даводзіцца больш радыкальнымі сродкамі наводзіць парадак», — гаварылася ў паведамленні.