Дэфіцыт бюджэту ў Беларусі перавысіў 30% ВУП

• 11.04.2026, 10:41

Антырэкорд з 2010 года.

За выключэннем крызісных перыядаў 2020 і 2022 гадоў такі значны дэфіцыт кансалідаванага бюджэту зафіксаваны ў 2025 годзе ўпершыню за 25 гадоў, піша сайт «Белорусы и рынок».

Гэта стала вынікам апераджальнага росту выдаткаў над даходамі, тлумачаць эканамісты праекта Macroby. Паступленні ў бюджэт павялічыліся прыкладна на 0,3 працэнтнага пункта, а выдаткі — на 1,5 п.п. У выніку выдаткі склалі 30,3% ВУП, а даходы — 29,5%.

На што патрацілі?

Трэць усіх выдаткаў кансалідаванага бюджэту ў 2025 годзе склалі асігнаванні на аплату працы бюджэтнікаў. На заробкі пайшла сума ў памеры 10% ВУП. Намінальная зарплата работнікаў бюджэтных арганізацый за год павялічылася амаль на 18%.

Таксама сродкі патрацілі на інвестыцыі ў эканоміку. Інвестыцыі за кошт бюджэтных рэсурсаў у рэальным вымярэнні за год выраслі на 15%. Улады звярталіся да квазіэмісійных схем фінансавання капітальных укладанняў: пакупкі Нацбанкам аблігацый урада на другасным рынку склалі 2,3 млрд рублёў.

Такім чынам, бюджэтная палітыка падтрымлівала звышпопыт у эканоміцы.

Адкуль паступалі грошы?

Пры адсутнасці значных прыродных рэсурсаў больш за 80% даходаў беларускага бюджэту забяспечваюць падаткі.

Сярод непадатковых паступленняў у бюджэт у 2025 годзе вылучаюцца грошы з Расіі (у тым ліку, верагодна, у рамках кампенсацый па зваротным акцызе для беларускіх НПЗ). Чысты прыток бягучых трансфертаў сектара дзяржаўнага кіравання дасягнуў 1,8% ВУП — параўнальны ўзровень паступленняў за апошнія дзесяць гадоў адзначаўся толькі ў 2018 годзе, калі функцыянавала схема «ператаможкі» расійскай нафты. Такім чынам, залежнасць беларускага бюджэту ад расійскіх трансфертаў павялічваецца.