Вэнс перад перамовамі зрабіў жорсткае папярэджанне Ірану

• 11.04.2026, 10:51

Дональд Трамп даў дэлегацыі дакладныя ўказанні.

Перад палётам у Пакістан віцэ-прэзідэнт ЗША Джэй Дзі Вэнс, які ўзначальвае амерыканскую дэлегацыю для перамоў з Іранам, заявіў: «Калі іранцы хочуць весці перамовы сумленна, мы гатовыя працягнуць адкрытую руку. Калі яны паспрабуюць з намі хітрыць, яны ўбачаць, што перамоўная каманда [ЗША] на гэта дрэнна адрэагуе», — піша Bild.

Па словах Вэнса, Дональд Трамп даў дэлегацыі «даволі выразныя ўказанні» адносна таго, як павінны праходзіць перамовы. Падрабязнасцяў віцэ-прэзідэнт не раскрыў і на пытанні журналістаў не адказаў, аднак выказаў надзею на станоўчы вынік.

Пасля гэтага сам Трамп прыгразіў Ірану новымі маштабнымі ўдарамі ў інтэрв'ю New York Post: «Мы загружаем караблі найлепшымі боепрыпасамі, найлепшай зброяй, калі-небудзь створанай — нават лепшай за тую, якую мы ўжо выкарыстоўвалі. Калі мы не дасягнём здзелкі, мы яе скарыстаем. І мы скарыстаем яе вельмі эфектыўна».

Прэзідэнт ЗША назваў гэта «перазапускам» вайсковай аперацыі. У Truth Social ён напісаў вялікімі літарамі: «НАЙМАЦНЕЙШЫ ПЕРАЗАПУСК У СВЕЦЕ!»