Толькі дзве краіны падтрымалі грашыма «Савет міру» Трампа

• 11.04.2026, 13:11

Агульная сума сродкаў не дасягнула аднаго мільярда.

Агенцтва Reuters са спасылкай на крыніцы паведаміла, што з дзевяці краін, якія паабяцалі фінансаванне створанага прэзідэнтам ЗША Дональдам Трампам «Савета міру», рэальныя ўзносы зрабілі толькі ААЭ, Марока і самі ЗША. Агульная сума атрыманых сродкаў, паводле дадзеных агенцтва, не дасягнула 1 млрд долараў.

Гаворка ідзе пра дамоўленасці, дасягнутыя на лютаўскім пасяджэнні «Савета міру» ў Вашынгтоне. Тады Трамп заявіў, што шэраг краін-удзельніц — Казахстан, Азербайджан, ААЭ, Марока, Бахрэйн, Катар, Саудаўская Аравія, Узбекістан і Кувейт — абавязаліся выдзеліць каля 7 млрд долараў на аднаўленне сектара Газа. ЗША, у сваю чаргу, планавалі дадаць яшчэ 10 млрд долараў, а ААН — 2 млрд. Сродкі меркавалася накіраваць, у тым ліку, на працу нацыянальнага камітэта па кіраванні Газай (NCAG), які павінен быў атрымаць кантроль над тэрыторыяй пасля раззбраення ХАМАС.

Паводле Reuters, прадстаўнік «Савета міру» Мікалай Младэнаў паведаміў палестынскім арганізацыям, што на дадзены момант сродкаў фактычна няма. Пры гэтым у арганізацыі адхілілі паведамленні пра недахоп фінансавання, заявіўшы, што структура дзейнічае як кампактны механізм рэалізацыі праектаў і прыцягвае капітал па меры неабходнасці. Там падкрэслілі, што ўсе запыты на фінансаванне нібыта выконваюцца аператыўна і ў поўным аб’ёме.