У Польшчы абвясцілі дату запуску новай платформы для падачы заяў на від на жыхарства
- 11.04.2026, 16:16
Пасля гэтага папяровыя заявы прымаць не будуць.
Сістэма MOS для падачы заяў на від на жыхарства ў Польшчы запрацуе 27 красавіка 2026 года. Пра гэта паведамілі ў Упраўленні па справах замежнікаў.
З гэтага часу праз платформу можна будзе падаць дакументы на часовы і пастаянны побыт, а таксама на картку доўгатэрміновага рэзідэнта ЕС. Заявы на так званую картку CUKR для ўкраінцаў пачнуць прымаць з 4 мая, піша Most.
Як толькі модуль запрацуе, ваяводскія адміністрацыі (ужонды) спыняць прыём папяровых заяў, незалежна ад даты іх адпраўкі. Апошні дзень, калі папяровая заява павінна паступіць у дзяржаўныя органы, — 26 красавіка. Калі пазней — яна не будзе разгледжаная. Таму ў Упраўленні па справах замежнікаў раяць паспяшацца тым, у каго тэрмін легальнага знаходжання ў Польшчы заканчваецца да 27 красавіка і прыблізна цягам двух тыдняў пасля гэтай даты.
Падача заяў на выдачу карткі побыту з адзнакай «Раней карыстаўся часовай абаронай» (так званай карткі CUKR) будзе магчымай з 4 мая 2026 года.
Якія заявы па-ранейшаму будуць прымацца ў папяровай форме
Праз партал MOS вы не зможаце падаць заявы на атрыманне дазволу на часовае знаходжанне:
- з мэтай выканання працы ў межах унутрыкарпаратыўнага пераводу;
- для доўгатэрміновай мабільнасці кіраўнічага работніка, спецыяліста або стажора ў межах унутрыкарпаратыўнага пераводу;
- для ўз’яднання з сям’ёй — у сітуацыі, калі замежнік, якога датычыцца заява, знаходзіцца па-за межамі Польшчы;
- для члена сям’і грамадзяніна Рэспублікі Польшча, грамадзяніна дзяржавы — члена ЕС або грамадзяніна Злучанага Каралеўства Вялікабрытаніі і Паўночнай Ірландыі, калі замежнік, якога датычыцца заява, знаходзіцца па-за межамі Польшчы;
- замежніку, які вядзе сямейнае жыццё ў разуменні Канвенцыі аб абароне правоў чалавека і асноўных свабод з грамадзянінам Рэспублікі Польшча, грамадзянінам дзяржавы — члена ЕС або грамадзянінам Злучанага Каралеўства Вялікабрытаніі і Паўночнай Ірландыі, калі замежнік, якога датычыцца заява, знаходзіцца па-за тэрыторыяй Рэспублікі Польшча.
У гэтых выпадках заявы па-ранейшаму будуць прымаць у папяровай форме.
Заявы на выдачу новай карткі (абмен) па-ранейшаму будуць прымацца ў папяровым выглядзе.