Колькі кулічоў і яек можна з'есці на Вялікдзень?

• 11.04.2026, 16:53

Рэкамендацыі лекара.

Пасля доўгага посту на стале нарэшце з'яўляюцца кулічы, яйкі і іншыя пачастункі, і стрымацца бывае нялёгка. Але менавіта ў гэты момант, папярэджваюць лекары, важна ведаць меру.

Пра тое, як не нашкодзіць сабе ў дні праваслаўнага Вялікадня, расказала mlyn.by лекар-гастраэнтэролаг Кацярына Кашух.

Праваслаўны Вялікдзень прыпадае на 12 красавіка. Менавіта з гэтага дня заканчваецца Вялікі пост.

Спецыяліст папярэджвае, што рэзкі пераход да тлустай і цяжкай ежы можа стаць стрэсам для арганізма.

Паводле яе слоў, падчас посту змяняецца абмен рэчываў, таму раптоўнае вяртанне да звыклага рацыёну нярэдка выклікае праблемы, асабліва ў людзей з захворваннямі страўнікава-кішачнага тракту.

Каб пазбегнуць непрыемных наступстваў, лекар раіць не накідвацца адразу на святочныя стравы.

Рацыён лепш пашыраць паступова, есці невялікімі порцыямі і рабіць гэта рэгулярна, прыблізна кожныя тры гадзіны. Пачынаць варта з больш лёгкай ежы, напрыклад, кісламалочных прадуктаў.

Колькі насамрэч можна

Найбольш цікавае — гэта, вядома, традыцыйныя велікодныя пачастункі. І тут лічбы могуць расчараваць.

Бяспечнай порцыяй куліча лічыцца ўсяго каля 100–150 грамаў. Гэта прыкладна 1–2 невялікія кавалачкі.

Яйкі, нягледзячы на іх карысць, таксама варта абмяжоўваць. Здароваму чалавеку дастаткова 2–3 яйкі на дзень. Прычым лепш есці іх у пачатку прыёму ежы.

Тым жа, у каго ёсць праблемы з узроўнем халестэрыну або захворванні печані, варта скараціць нават і гэтую невялікую колькасць.