У арміі ЗША пацвердзілі праход баявых караблёў у Армузскім праліве

• 12.04.2026, 9:10

І анансавалі перакід новых сіл.

У арміі ЗША пацвердзілі інфармацыю пра праход амерыканскіх баявых караблёў у Армузскім праліве, пра што СМІ пісалі ў суботу.

Як паведамілі у Цэнтральным камандаванні, у праходзе праз праліў удзельнічалі эскадраныя мінаносцы USS Frank E. Peterson і USS Michael Murphy, узброеныя кіраванымі ракетамі.

У паведамленні гаворыцца, што манеўры караблёў з'яўляюцца часткай больш маштабнай місіі, мэтай якой з'яўляецца поўная ачыстка праліву ад мін, усталяваных іранскімі вайскоўцамі.

У камандаванні адзначылі стратэгічнае значэнне Армузскага праліву для міжнароднага гандлю і эканамічнага дабрабыту і анансавалі перакід дадатковых сіл у рэгіён.

У прыватнасці, да аперацыі па размінаванні далучацца беспілотнікі.