Як у Беларусі за апошнія пяць гадоў змяніліся цэны на летні адпачынак на моры

• 12.04.2026, 12:32

Параўнанне коштаў на пуцёўкі ўражвае.

Цэны на пуцёўкі на моры за апошнія пяць гадоў узраслі прыкладна ўдвая. Пра гэта Наталля Назарава, кіраўніца аднаго з офісаў продажаў тураператара FUN&SUN у Беларусі, расказала выданню «Точка».

Паводле слоў Назаравай, у 2020—2023 гадах адпачынак для аднаго чалавека ў Егіпце абыходзіўся ў 500 даляраў. З таго часу сума павялічылася да 800−1000 даляраў.

Пуцёўка ў Турцыю каштавала каля 470 даляраў, цяпер — ад 1200 да 1400 даляраў.

Рост, паводле слоў суразмоўніцы, тлумачыцца не толькі інфляцыяй, але і змяненнем працягласці пералётаў: з’явілася неабходнасць аблятаць закрытую паветраную прастору — як Украіны, так і Еўразвязу. Плюс павысіўся кошт паліва.

Ёсць варыянт зэканоміць і выбраць «гарачыя» пуцёўкі. Напрыклад, пры куплі пуцёўкі ў Егіпет на красавік можна зэканоміць да 860 даляраў (дзесяць начэй, двое чалавек, «ўсё ўключана»). Прыблізна на 100 даляраў танней можа абысціся падарожжа ў Санью (Кітай, востраў Хайнань). Праўда, пяць гадоў таму цэны на «гарачыя» туры былі, вядома, яшчэ ніжэйшыя.