Ахову адной з рэзідэнцый Пуціна рэзка ўзмацнілі

• 12.04.2026, 15:57

Да аб’екта сцягнулі сродкі СПА, нягледзячы на іх катастрафічны дэфіцыт на фронце.

У сакавіку 2026 года вакол рэзідэнцыі расійскага дыктатара Уладзіміра Пуціна на Валдаі пабудавалі 7 новых вежаў з самаходнымі зенітнымі ракетна-гарматнымі комплексамі (ЗРГК) «Панцыр». Пра гэта сведчаць спадарожнікавыя здымкі Planet.com, паведамляе «Радыё Свабода».

Зазначаецца, што агульная колькасць сістэм СПА вакол валдайскай рэзідэнцыі Пуціна дасягнула 27 адзінак. Паводле спадарожнікавых здымкаў, будаўніцтва адразу 7 новых вежаў для «Панцыраў» пачалося 17 сакавіка. Некаторыя з іх ужо абсталяваныя ЗРГК.

Журналісты звярнулі ўвагу, што сістэмы СПА на Валдаі размешчаныя вакол рэзідэнцыі Пуціна двума кольцамі вялікага і малога дыяметра, як і вежы з «Панцырамі» вакол Масквы.

Акрамя таго, журналісты нагадалі, што раней больш за 20 вежаў з буйнакалібернымі кулямётамі, а таксама некалькі падыумаў з ЗРГК «Панцыр» былі заўважаныя на тэрыторыі і па перыметры асаблівай эканамічнай зоны «Алабуга» ў Татарстане, дзе расіяне вырабляюць дроны «Герань».