Трамп: ЗША не дазволяць Ірану мець ядзерную зброю

• 12.04.2026, 17:21

Амерыканскі прэзідэнт агучыў вынікі перамоваў у Пакістане.

Прэзідэнт ЗША Дональд Трамп заявіў, што перамовы з Іранам у Пакістане прайшлі добра. Паводле яго слоў, удалося пра многае дамовіцца, але пытанне ядзернай зброі так і не вырашана.

Пра гэта паведамляе «РБК-Украіна» са спасылкай на яго пост у сацсетцы Truth Social.

«Ітак, сустрэча прайшла добра, большасць пытанняў былі ўзгодненыя, але адзіны сапраўды важны момант, ядзерны, застаўся нявырашаным», - напісаў Трамп.

Следам ён апублікаваў яшчэ адзін пост. У ім прэзідэнт зноў закрануў тэму перамоваў і агучыў сваю пазіцыю наконт ядзернай зброі Ірана.

Паводле Трампа, учарашняя сустрэча з Іранам пачалася рана раніцай і цягнулася ўсю ноч. Усяго гэта заняло каля 20 гадзін.

Лідар ЗША піша, што мог бы падрабязна распавесці пра дасягнутыя вынікі, але самае галоўнае, паводле яго слоў, адно — Іран не жадае адмаўляцца ад сваіх ядзерных амбіцый.

«У многіх адносінах дасягнутыя дамоўленасці лепшыя, чым працяг нашых ваенных аперацый да канца, але ўсе гэтыя пункты не маюць значэння ў параўнанні з тым, каб дазволіць ядзернай энергіі апынуцца ў руках такіх неўраўнаважаных, складаных і непрадказальных людзей», - гаворыцца ў публікацыі.

Трамп дадаў, што за час перамоваў трое яго прадстаўнікоў (маецца на ўвазе віцэ-прэзідэнт Джэй Дзі Вэнс і спецпасланнікі Стыў Уіткоф і Джарэд Кушнер), «вельмі зблізіліся і сталі паважаць» іранскіх прадстаўнікоў. Але ў сувязі з адмовай ад «ядзеркі» — гэта не мае значэння.

«Гэта не мае значэння, таму што яны былі вельмі непахісныя ў самым важным пытанні і, як я заўсёды казаў з самага пачатку і шмат гадоў таму, у Ірана ніколі не будзе ядзернай зброі!», - падсумаваў прэзідэнт ЗША.