У Гомелі забаранілі ездзіць на электрасамакатах уначы

• 12.04.2026, 17:28

Хуткасць руху па горадзе абмежавалі да 10 км/г.

У Гомелі з 10 красавіка забаранілі кіроўцам сродкаў персанальнай мабільнасці (СПМ) ездзіць уначы. Акрамя таго, на электрасамакаце нельга будзе пракаціцца ў некаторых лакацыях абласнога цэнтра і ўдзень. Падрабязнасці паведаміў старшыня Гомельскага гарвыканкама Уладзімір Прывалаў у сваім Telegram-канале.

Прывалаў растлумачыў, што разганяцца на электрасамакаце можна да 10 км/г. Выключэнне — веладарожкі і праезная частка. А пры пад'ездзе да пешаходных пераходаў максімальная хуткасць павінна быць 7 км/г.

Вось месцы ў Гомелі, дзе забаронены рух на электрасамакатах:

— набярэжная ракі Сож,

— тэрыторыя палацава-паркавага ансамбля,

— скверы (імя Янкі Купалы, Ракасоўскага, Грамыкі і іншыя),

— алеі,

— парк «Фестывальны» і іншыя аналагічныя месцы.

У мабільным прыкладанні кікшэрынгу размясцілі мапу ўсіх забароненых зон у гэтым абласным цэнтры.

У любым месцы горада нельга ездзіць на электрасамакатах з 00:00 да 05:00, то бок у начны час. А для непаўналетніх маладзей за 14 гадоў — поўная забарона.

Акрамя таго, забаронена перасоўвацца на СПМ у п'яным выглядзе, ездзіць удвух або ўтраіх на адным самакатзе, перашкаджаць іншым удзельнікам дарожнага руху.

Старшыня Гомельскага гарвыканкама нагадаў пра неабходнасць спешвацца з СПМ на пешаходных пераходах. Гэта правіла не дзейнічае толькі ў спецыяльна абазначаных зонах.