У Гомельскай вобласці шматдзетную маці занеслі ў «дармаеды»

• 12.04.2026, 18:25

З-за гэтага камунальныя плацяжы выраслі да 700 рублёў.

Жанчына з трыма дзецьмі жыве ў арэндным жыллі ў сельскай мясцовасці ў Гомельскай вобласці. Як яна распавяла «Сильным новостям», звычайна за трохпакаёвую кватэру атрымлівалася каля 300 рублёў (разам з арэндай). Але рахункі раптам пачалі расці — з кастрычніка 2025-га. Жанчына думала, што гэта звычайнае падаражанне, але на ўсялякі выпадак удакладніла ў разліковым цэнтры, ці не налічваецца ёй «дармаедская» камуналка. Там запэўнілі, што ўсё добра.

Тэрпенне скончылася ў лютым, калі прыйшла жыроўка на 700 рублёў. Дзяўчына паехала разбірацца ў райвыканкам. Аднак там яе чакала нечаканая заява — супрацоўнікі сцвярджалі, што яна не лічыцца «занятай у эканоміцы».

«Пераканаць іх, што шматдзетная маці па змаўчанні лічыцца занятай, аказалася немагчыма. Казалі, што такімі з'яўляюцца толькі маці дзяцей-інвалідаў або тых, каму няма 7 гадоў. У выніку знялі копію пасведчання аб нараджэнні малодшага дзіцяці і паабяцалі пераразлік у наступным месяцы. Але тую жыроўку на 700 рублёў прымусілі аплаціць цалкам: «Інакш будзе пеня», — распавядае шматдзетная мама.

У сакавіку пераразлік сапраўды зрабілі, але радасць аказалася нядоўгай. У красавіку ў жыроўцы зноў красаваліся велізарныя лічбы па поўным тарыфе.

Жанчыне давялося браць дзяцей і зноў ехаць у выканкам. На гэты раз на месцы была начальніца аддзела. Яна без лішніх пытанняў узяла пасведчанне шматдзетнай сям'і, і толькі тады праблему ўдалося вырашыць канчаткова.

Найцікавейшае высветлілася, калі кіраўніца пачала разбірацца, чаму падначаленыя не выправілі ўсё раней. У базе даных раптам выявіўся нейкі «працоўны дагавор» на імя жанчыны, якога «ніколі не было».

«Я пастаянна знаходжуся дома з дзецьмі, двое старэйшых часта хварэюць, у сына прыроджаная загана сэрца. Я нідзе не працую, мы не стаім ні на якіх уліках і не атрымліваем дадатковых дапамог», — здзіўляецца жанчына.

Цяпер яе камуналка ўжо прыходзіць у норму.