Рэдкую і незвычайную качку заўважылі ў Мінску

• 13.04.2026, 14:22

Яе назвалі ў гонар кітайскіх вяльможаў.

На Свіслачы ў раёне Пуліхава мінчанка Вольга сустрэла рэдкую для Беларусі качку-мандарынку. Назва экзатычнай качкі звязаная не з аранжавым фруктам, а з вобразам кітайскіх вяльмож — мандарынаў. Яркае, стракатае апярэнне самцоў гэтай птушкі нагадвае раскошныя ўборы чыноўнікаў у імператарскім Кітаі, піша Onliner.by.

— Птушка здавалася мне палохлівай, іншых качак побач не назіралася. Дачка казала, што яшчэ ўчора бачыла мандарынку ў парку, але я ў нашым раёне яе не сустракала, хоць пастаянна тут гуляю, — адзначае Вольга.

Прыродны арэал пражывання мандарынкі — Усходняя Азія. Як жа гэтыя качкі трапляюць у Беларусь? У Беларусі мандарынка — рэдкі залётны від.

— Мандарынкі — вельмі яркія і прыгожыя птушкі, таму людзі часта трымаюць іх у заапарках і прыватных гаспадарках, з-за чаго гэтыя качкі распаўсюдзіліся далёка за межы свайго прыроднага арэала на Далёкім Усходзе. З цягам часу частка птушак пачала ўцякаць, і ў Еўропе з такіх асобін сфармаваліся ўстойлівыя дзікія папуляцыі, якія паспяхова размнажаюцца ў прыродзе і паступова расселяюцца, — расказвае арнітолаг і кіраўнік праекта Kryly.by Сямён Левы.

Такім чынам, мандарынкі ў Беларусі могуць з'яўляцца па дзвюх асноўных прычынах: або гэта птушкі, якія ўцяклі з прыватных калекцый — такіх, напрыклад, рэгулярна назіраюць на Бярэзіне ў раёне Барысава. Або гэта здзічэлыя асобіны з еўрапейскіх папуляцый.

Часта ўладальнікі дэкаратыўных птушак кальцуюць сваіх гадаванцаў, менавіта па гэтай прыкмеце можна зразумець, ці была калі-небудзь мандарынка хатняй. А яшчэ — па паводзінах птушкі. Калі яна жыла побач з чалавекам, то паводзіць сябе больш даверліва.