Канцлер Германіі: у Расіі няма шанцаў на перамогу ў вайне з Украінай

• 14.04.2026, 22:54

Фрыдрых Мерц таксама заклікаў як мага хутчэй выдзеліць Кіеву сродкі на ваенную падтрымку.

Канцлер Германіі Фрыдрых Мерц заявіў, што Расія не мае шанцаў на перамогу ў вайне ва Украіне. Пра гэта піша газета Die Welt.

«У Расіі няма шанцаў выйграць вайну. <...> Сродкі на ваенную падтрымку [Украіны] павінны быць выдзеленыя як мага хутчэй. Расія павінна паставіцца да гэтага сур'ёзна», — заявіў ён.

14 красавіка Мерц сустрэўся з прэзідэнтам Украіны Уладзімірам Зяленскім. На гэтай сустрэчы Германія і Украіна дамовіліся аб стратэгічным партнёрстве, і паміж краінамі быў падпісаны шэраг дамоваў, у тым ліку пагадненне аб супрацоўніцтве ў сферы абароны і мемарандум аб узаемаразуменні.

Падчас прэс-канферэнцыі Мерц заявіў, што Еўропа будзе абмяркоўваць хуткія рашэнні адносна прыняцця новага пакета санкцый супраць Расіі, каб «перасушыць» крыніцы даходаў ад ценявага флоту Масквы. Таксама нямецкі канцлер сказаў, што Еўропа павінна быць часткай пагаднення па Украіне, і паабяцаў паспрыяць вяртанню ва Украіну мужчын прызыўнога ўзросту.