Дроны атакавалі нафтахімічныя прадпрыемствы ў расійскім Башкартастане

• 15.04.2026, 12:20

Пад ударам апынуўся горад Стерлітамак.

У сераду, 15 красавіка, дроны атакавалі нафтахімічныя прадпрыемствы ў расійскай рэспубліцы Башкартастан.

Пра гэта паведамляе Charter97.org са спасылкай на Telegram кіраўніка Цэнтра супрацьдзеяння дэзінфармацыі РНБО Украіны Андрэя Каваленкі.

Паводле інфармацыі Каваленкі, пад ударам дронаў апынуўся горад Стерлітамак. Гэта адзін з цэнтраў хімічнай і нафтахімічнай прамысловасці РФ.

Там, у прыватнасці, знаходзіцца Стерлітамакскі нафтахімічны завод, які вырабляе іонол — прысадку да авіяцыйнага паліва і алеяў для ваеннай тэхнікі.

Таксама ў горадзе размешчаныя іншыя прадпрыемствы, якія забяспечваюць важныя кампаненты для авіяцыйнай і ракетнай тэхнікі, у прыватнасці для вытворчасці выбуховых рэчываў, пораху, боепрыпасаў.

Кіраўнік рэгіёна Радый Хабіроў заявіў, што СПА нібыта збіла некалькі дронаў над прамысловай зонай Стерлітамака. Абломкі ўпалі на тэрыторыю аднаго з прадпрыемстваў.

«Абломкі ўпалі на тэрыторыю аднаго з прадпрыемстваў. Усе службы працуюць на месцы, тушаць узніклы пажар. Высвятляем падрабязнасці», — напісаў ён у Telegram.