Прадстаўлены новы Volkswagen ID.3 Neo

• 15.04.2026, 15:53

Электрамабіль атрымаў абноўлены салон і запас ходу больш за 600 км.

У Германіі прэзентаваны новы Volkswagen ID.3 Neo. Электрычны хэтчбэк радыкальна змяніўся ўнутры, а яго запас ходу перавысіў 600 км.

Электрамабіль Volkswagen ID.3 прайшоў грунтоўную мадэрнізацыю і стане даступным для папярэдняга заказу заўтра, 16 красавіка. Яго падрабязнасці раскрытыя на сайце нямецкага аўтавытворцы.

Нядаўна СЕО Volkswagen Томас Шэфер раскрытыкаваў электрамабілі VW ID.3 і ID.4 і назваў іх «нясапраўднымі» Volkswagen, бо, на ягоную думку, пры праектаванні мадэляў дапусцілі шэраг памылак. Версія Neo іх выпраўляе.

Дызайн Volkswagen ID.3 2026 абнавілі ў новым фірмовым стылі. Яго фары цяпер злучаныя дыёднай паласой, таксама замянілі ліхтары і бамперы.

Салон Volkswagen ID.3 Neo перажыў значна больш сур'ёзныя змены. Электракар атрымаў новыя руль, пярэднюю панэль і цэнтральную кансоль. Таксама ўсталявалі новы лічбавы прыборны шчыток і павялічаны (10,25 або 12,9 цалі) цэнтральны тачскрын, а за даплату прапануюць праекцыю на лабавое шкло з дапоўненай рэальнасцю.

Яшчэ адна важная змена — з'яўленне вялікай колькасці фізічных перамыкачоў. Менавіта на іх адсутнасць скардзіліся і ўладальнікі VW ID.3, і эксперты, і аўтажурналісты.

Сярод даступных для Volkswagen ID.3 Neo опцый — панарамны дах, камеры кругавога агляду, акустыка Harman Kardon, паркоўны аўтапілот, электрапрывад і масаж сядзенняў.

Сілавыя ўстаноўкі таксама дапрацавалі. Новы Volkswagen ID.3 дэбютаваў у версіях магутнасцю 170, 190 і 231 к. с. з батарэямі ёмістасцю 50, 58 і 79 кВт∙г. Запас ходу вырас і цяпер дасягае 630 км.