Z-блогеры спалохаліся «Вялікага Турана»
- 15.04.2026, 16:14
Прэзідэнт Турцыі сустрэўся з музыкантамі з Башкартастана.
Прэзідэнт Турцыі Рэджэп Таіп Эрдаган на пачатку красавіка правёў закрытую сустрэчу з башкірскім этна-фолк-гуртом Ay Yola, які атрымаў шырокую вядомасць дзякуючы трэку Homay, што стаў асабліва папулярным у цюркамоўных краінах. Калектыў запрасілі ў прэзідэнцкі палац. Паводле дадзеных Anadolu, на сустрэчы абмяркоўвалі творчасць гурта і знакавыя падзеі ў музычным свеце. У завяршэнне мерапрыемства быў зроблены сумесны фотаздымак, і Эрдаган пажадаў удзельнікам Ay Yola поспехаў. Таксама гурт выступіў на турэцкім канале TRT Avaz у межах канцэрта, прыурачанага да свята Навруз, піша The Moscow Times.
Пасля гэтага z-блогеры абвінавацілі Ay Yola ў прасоўванні ідэй пантуркізму. Так, прапагандыст Сяргей Мардан заявіў, што «замест Рускага свету проста ў нас унутры, у Казані і Уфе, прарастае Вялікі Туран». «Дурна думаць, што экспансія пантуркізму, які паўстаў з попелу гісторыі, абмяжоўваецца рэспублікамі былога Савецкага Саюза. Расійскія рэгіёны, якія ідэолагі Турана лічаць цюркскімі, <�…> таксама ў зоне небяспекі», — сказаў ён.
Са свайго боку блогер Дзмітрый Нікотін заявіў, што сустрэча Эрдагана з Ay Yola — «не культурны жэст, а элемент сістэмнай палітыкі мяккай сілы». «Турцыя сістэмна фармуе наратыў „адзінай цюркскай цывілізацыі“. Ay Yola трапілі на сустрэчу да Эрдагана не таму, што гэта проста папулярны расійскі гурт, а як папулярызатары цюркскай ідэнтычнасці», — напісаў ён.
На думку Нікотіна, такія кантакты ўяўляюць для Расіі «ментальную пагрозу», бо башкіры і татары могуць пачаць лічыць сябе «часткай „цюркскага свету“ з цэнтрам у Анкары, што будзе падрываць расійскую грамадзянскую ідэнтычнасць знізу, без адзінага стрэлу».
Удзельнікі Ay Yola адхілілі абвінавачанні, назваўшы гурт выключна культурным праектам.