ЗША выцясняюць Расію з Балканаў

• 15.04.2026, 17:54

Боснія абрала амерыканскага інвестара для газавага праекта з Харватыяй.

Парламент Босніі і Герцагавіны ўхваліў выбар амерыканскай кампаніі AAFS Infrastructure and Energy LLC у якасці ключавога інвестара праекта газаправода з Харватыяй. Гэты праект разглядаецца як важны крок да змяншэння залежнасці краіны ад расійскага газу, піша агенцтва Reuters (пераклад — сайт Charter97.org).

Абедзве палаты парламента ўнеслі змены ў заканадаўства, якое рэгулюе будаўніцтва газаправода. Ён павінен забяспечыць пастаўкі звадкаванага прыроднага газу з тэрмінала на харвацкім востраве Крк.

Раней аператарам праекта была дзяржаўная кампанія BH Gas, аднак яе выключылі з закону пасля шматгадовых разыходжанняў. Прадстаўнікі харвацкай часткі Федэрацыі настойвалі на стварэнні новага аператара ў рэгіёнах, праз якія пройдзе трубаправод.

Улады тлумачаць рэформу неабходнасцю дыверсіфікацыі энергазабеспячэння. Гэта асабліва актуальна на фоне планаў Еўрасаюза спыніць пастаўкі расійскага газу да 2028 года.

Паводле слоў дырэктара AAFS у Сараеве Амера Бекана, агульны аб'ём інвестыцый складзе каля 1,5 млрд долараў. Асноўная частка сродкаў пойдзе на будаўніцтва газаправода, яшчэ каля 300 млн — на мадэрнізацыю аэрапортаў Сараева і Мостара.

Цяпер Боснія цалкам залежыць ад паставак расійскага газу, які паступае праз Сербію па трубаправодзе TurkStream. Пры гэтым газ пакрывае каля 8% энергетычных патрэбаў краіны.

Чакаецца, што ў найбліжэйшы час урад падпіша пагадненне з AAFS, а таксама асобную дамову з Харватыяй. Аднак эксперты папярэджваюць, што складаная адміністрацыйная сістэма краіны можа запаволіць рэалізацыю праекта.