На Цэнтральным аўтавакзале Мінска здарыўся патоп

• 16.04.2026, 16:28

Прарвала трубу — вада хлынула на платформы.

На аўтавакзале «Цэнтральны» 16 красавіка прарвала трубу над платформамі. Відэа інцыдэнту апублікаваў тэлеграм-канал «Мінчанін». Пазней інфармацыю пракаментавалі ў адміністрацыі Кастрычніцкага раёна сталіцы.

Арганізацыя, што абслугоўвае гандлёвы цэнтр Galileo, праводзіла планавыя выпрабаванні і прачышчэнне ліўнёвай каналізацыі паркінгу. З-за высокага ціску пашкодзілася труба, што праходзіла над платформамі аўтавакзала.

«На дадзены момант цеча ўхілена. Работнікі аўтавакзала правялі прыбіранне тэрмінала», — запэўнілі ў адміністрацыі Кастрычніцкага раёна сталіцы.