Новыя камеры з'явіліся на беларускіх дарогах

• 17.04.2026, 10:24

Чарговы сюрпрыз для вадзіцеляў.

На дарогах краіны запушчаны чарговы эксперымент. У Мінскай вобласці заўважылі камеры, якія працуюць па-новаму.

Ідзе гаворка пра ўчастак трасы Р-53 ад Жодзіна да Кургана Славы, дзе сістэму перавялі ў эксперыментальны рэжым.

Цяпер камеры не толькі фіксуюць хуткасць, але і выводзяць інфармацыю пра парушэнні проста на вялікае табло над дарогай.

Так, на экране паказваюцца нумар аўтамабіля і кароткія паведамленні тыпу «Прышпіліцеся».

Акрамя фіксацыі бягучых парушэнняў, сістэма таксама можа нагадваць вадзіцелям пра нявыплачаныя штрафы па лініі ДАІ або пра непрайдзены тэхагляд.

Пры гэтым усё гэта адбываецца ў рэжыме рэальнага часу, проста падчас руху.

Што кажуць вадзіцелі

Рэакцыя на новаўвядзенне аказалася неадназначнай. У сацсетках многія пішуць, што толку ад такіх табло няшмат: большасць вадзіцеляў проста не звернуць увагі на лічбы і паведамленні.

Хтосьці ўспрымае ідэю з гумарам і прызнаецца, што не заўсёды адразу ўспомніць нумар свайго аўтамабіля, каб пазнаць яго на экране.

Ёсць і больш жорсткая крытыка. На думку некаторых вадзіцеляў, такія табло могуць адцягваць ад дарогі: пакуль спрабуеш разгледзець свой нумар, лёгка ўпусціць сітуацыю на трасе.