Украіна адчула ўзмацненне падтрымкі ЗША

• 17.04.2026, 12:16

Пра гэта заявіла прэм’ер-міністр Украіны пасля візіту ў Вашынгтон.

Прэм’ер-міністр Украіны Юлія Свірідэнка заявіла, што па выніках візіту ў Вашынгтон адчувае больш упэўненую падтрымку з боку ЗША. Пра гэта яна расказала ў інтэрв’ю Reuters пасля серыі сустрэч з амерыканскімі чыноўнікамі (пераклад — сайт Charter97.org).

Паводле слоў Свірідэнкі, перамовы, у тым ліку з міністрам фінансаў ЗША Скотам Бэсэнтам, прайшлі ў канструктыўнай і сяброўскай атмасферы. Яна падкрэсліла, што Вашынгтон разумее як важнасць захавання і ўзмацнення санкцый супраць Расіі, так і неабходнасць мер па іх выкананні.

Раней ЗША часова аслабілі абмежаванні на расійскую нафту на фоне збояў паставак з-за канфлікту вакол Ірана, аднак цяпер санкцыі зноў дзейнічаюць у поўным аб’ёме.

Украінскі бок настойвае, што любыя перамовы аб завяршэнні вайны магчымыя толькі пры наяўнасці надзейных гарантый бяспекі. Свірідэнка таксама адзначыла неабходнасць выразнага плана аднаўлення краіны і эканамічнага развіцця.

Паводле яе слоў, за апошні год умацаваліся эканамічныя сувязі паміж Кіевам і Вашынгтонам. У прыватнасці, ідзе гаворка пра сумесны інвестыцыйны фонд аднаўлення, які ўжо ўхваліў першы праект і рыхтуецца зацвердзіць другі — у энергетыцы.

Акрамя таго, Украіна паглыбляе супрацоўніцтва з Міжнародным валютным фондам. У лютым быў ухвалены крэдыт на $8 млрд, а ў маі чакаецца візіт місіі МВФ у Кіеў. Фонд ужо змякчыў шэраг умоваў праграмы, улічваючы пагаршэнне сітуацыі з-за расійскіх атак на энергетычную інфраструктуру.

Свірідэнка таксама выказала надзею, што палітычныя змены ў Венгрыі дапамогуць разблакаваць новы пакет санкцый ЕС супраць Расіі і фінансавую дапамогу Украіне. Яна падкрэсліла, што Кіеў разлічвае паскорыць працэс інтэграцыі ў Еўрасаюз.