У Мінску ў транспарце з'явяцца кнопкі адчынення дзвярэй

• 18.04.2026, 2:16

Пасажыры змогуць самі адчыняць дзверы на прыпынках.

У Мінску з 1 мая ў гарадскім транспарце запрацуюць кнопкі адраснага адчынення дзвярэй. Пра гэта паведаміў «Мінсктранс».

Пасажыры змогуць самастойна адчыніць дзверы, націснуўшы кнопку, каб зайсці ў салон або выйсці з яго. Кнопкі лёгка заўважыць: яны выдзяляюцца прыкметным корпусам і маюць дадатковае святлодыёднае падсвятленне.

«Падчас руху сістэма адраснага адчынення дзвярэй блакуецца, скарыстацца кнопкамі не атрымаецца. Толькі на прыпыначным пункце пры поўным спыненні транспартнага сродку кнопкі адраснага адчынення дзвярэй становяцца актыўнымі», — адзначылі ў «Мінсктрансе».