Улады Малдовы заперлі расійскіх вайскоўцаў у Прыднястроўі

• 18.04.2026, 3:24

Афіцэрам забаранілі ўезд на тэрыторыю, падкантрольную Кішынёву.

Улады Малдовы абмежавалі перамяшчэнне расійскіх вайскоўцаў, якія знаходзяцца ў Прыднястроўі. Паводле афіцыйнай інфармацыі, шэсць высокапастаўленых афіцэраў расійскай аператыўнай групы войскаў, якая там дыслакуецца, абвешчаныя ў Малдове персонамі нон-грата, піша Deutsche Welle.

Прынятае рашэнне азначае, што расійскім камандзірам забаронена знаходзіцца на тэрыторыі Малдовы, якая кантралюецца ўладамі краіны (на правым беразе Днястра).

Калі хто-небудзь з іх паспрабуе трапіць туды, яго неадкладна дэпартуюць з Малдовы без права вяртання.

Фактычна гэта азначае, што камандаванне расійскага кантынгенту застаецца абмежаваным у сваіх перамяшчэннях тэрыторыяй Прыднястроўя, бо праз тэрыторыю Украіны выбрацца з яго цяпер тым больш не атрымаецца.

У спіс непажаданых асоб увайшлі камандуючы групай войскаў Дзмітрый Зяленкоў, тры яго намеснікі — Дзмітрый Апалеў, Сяргей Машчэнка і Сяргей Шыршоў, — а таксама начальнік штаба Марат Ярулін і кіраўнік палявога банка ў Ціраспалі Аляксей Багамолаў.

Акрамя таго, абмежаванні закранаюць і сем’і гэтых афіцэраў: яны страчваюць доступ да шэрагу паслуг на тэрыторыі Малдовы, у тым ліку да медыцынскай дапамогі і афармлення дакументаў.

Малдаўскі бок тлумачыць гэтыя меры тым, што прысутнасць расійскіх войскаў лічыцца незаконнай і разглядаецца як пагроза бяспецы краіны.