Як беларусам адмовіцца ад удзелу ў лукашэнкаўскім «суботніку»

• 18.04.2026, 10:38

Паводле артыкула 137 Працоўнага кодэкса чалавек выкарыстоўвае выходныя дні паводле ўласнага меркавання.

У Беларусі адмова ад удзелу ў рэспубліканскім суботніку не можа быць падставай для пакарання. Гэта вынікае з пастановы Савета Міністраў.

У першы дзень доўгіх выходных, 18 красавіка, многія беларусы ўдзельнічаюць у рэспубліканскім суботніку.

Але пакараць за адмову ўдзельнічаць у ім паводле закона не могуць, бо такое мерапрыемства праводзіцца толькі на добраахвотнай аснове, піша «Зеркало».

У дакуменце гаворыцца, што суботнік — гэта бясплатная праца на карысць грамадства ў вольны ад працы час. Пры гэтым беларускае заканадаўства не прадугледжвае самога паняцця «суботнік» як абавязковай формы занятасці.

З гэтага вынікае, што работнік мае права адмовіцца ад удзелу: паводле артыкула 137 Працоўнага кодэкса чалавек выкарыстоўвае выходныя дні паводле ўласнага меркавання. Таму неўдзел у суботніку не лічыцца дысцыплінарным парушэннем.

Акрамя таго, у асобных выпадках да работ у межах суботніка могуць не дапусціць. Гэта датычыць людзей з дрэнным самаадчуваннем, у стане алкагольнага або наркатычнага ап’янення, без неабходнай падрыхтоўкі для небяспечных прац або без сродкаў індывідуальнай абароны.

Нагадаем, папярэдні рэспубліканскі суботнік праходзіў 25 кастрычніка. Тады толькі палову сродкаў накіроўвалі на будаўніцтва Нацыянальнага гістарычнага музея Беларусі, астатняе пакідалі ў распараджэнні аблвыканкамаў.

На гэты раз «грашовыя сродкі, заробленыя ад правядзення вясновага суботніка, будуць накіраваныя на стварэнне пастаяннай экспазіцыі Нацыянальнага гістарычнага музея Беларусі, які будуецца, і іншыя працы, звязаныя з гэтым», — паведамляла прэс-служба ўрада.