Мадьяр патрабуе перавыбараў на адной з акругаў

• 18.04.2026, 18:59

На ёй «Фідэс» выстаўіла поўнага цёзку будучага прэм’ера Вугоршчыны.

Лідар партыі-пераможцы парламенцкіх выбараў у Вугоршчыне «Ціса» Петер Мадьяр патрабуе перавыбараў у аднамандатнай акрузе, дзе, паводле яго пераканання, палітычная сіла прайграла выключна з-за падстаўнога кандыдата з такім жа імем — Петер Мадьяр.

Як паведамляе «Еўрапейская праўда», з такім заклікам ён выступіў у суботу, 18 красавіка.

Мадьяр заклікаў да перавыбараў у 2-й акрузе ў медзьі Ваш ля мяжы з Аўстрыяй, дзе перамог кандыдат партыі Віктара Орбана «Фідэс», апярэдзіўшы прадстаўніка «Цісы» на 258 галасоў.

Па яго словах, кандыдат «Цісы» Вікторыя Стромпава не змагла перамагчы менавіта з-за прысутнасці ў бюлетэні фармальна незалежнага кандыдата з імем Петер Мадьяр, звязанага з «Фідэс».

За «фальшывага Мадьяра» прагаласавалі больш за 900 выбаршчыкаў, і палітык упэўнены, што ў большасці выпадкаў гэта былі прыхільнікі «Цісы», уведзеныя ў зман супадзеннем імёнаў.

Мадьяр назваў сітуацыю «расійскімі метадамі ў найбольш цынічнай форме» і патрабуе прызначыць паўторнае галасаванне ў акрузе.

Адзначаецца, што гэты «падстаўны» кандыдат амаль не вёў публічнай кампаніі, не пражывае ў горадзе Шарвар (адміністрацыйны цэнтр акругі) і працуе ў Аўстрыі. Да выдалення сваіх старонак у сацсетках ён публікаваў фатаграфіі з вядучымі прадстаўнікамі «Фідэс», уключаючы Орбана. Акрамя таго, 15 сакавіка яго заўважылі на праўладнай дэманстрацыі, хоць на той момант ён ужо лічыўся «незалежным кандыдатам», піша 444.

Нагадаем, у Вугоршчыне працягваецца падлік галасоў замежных выбаршчыкаў і тых, хто галасаваў не па месцы рэгістрацыі.

Партыі «Ціса» прагназуюць 141 мандат у парламенце, нават калі вынікі па астатніх канкурэнтных акругах не зменяцца на яе карысць.