WSJ: Саветнікі просяць Трампа радзей даваць інтэрв'ю

• 19.04.2026, 10:49

З-за супярэчлівых заяў.

Саветнікі прэзідэнта ЗША Дональда Трампа усё часцей заклікаюць яго абмежаваць спантанныя выступы ў медыя, бо яны ўплываюць на перамовы і агульную камунікацыю.

Пра гэта паведамляе The Wall Street Journal.

Па дадзеных выдання, занепакоенасць у камандзе Трампа ўзмацнілася на фоне яго публічнай актыўнасці падчас абвастрэння сітуацыі на Блізкім Усходзе і перамоў з Іранам. Прэзідэнт часта робіць рэзкія або неўзгодненыя заявы, якія могуць адрознівацца ад афіцыйнай пазіцыі Белага дома.

У прыватнасці, Трамп неаднаразова тэлефанаваў журналістам і даваў каментары без узгаднення з саветнікамі, часам робячы гучныя або супярэчлівыя заявы адносна вайны і магчымых дзеянняў ЗША.

Паводле крыніц, яго найбліжэйшыя памочнікі наўпрост раілі яму абмежаваць імправізаваныя інтэрв'ю, бо яны толькі ўзмацняюць адчуванне нестабільнасці і ствараюць праблемы для камунікацыі з саюзнікамі і грамадскасцю.

Нягледзячы на гэта, прэзідэнт не заўсёды прытрымліваецца гэтых рэкамендацый. Як адзначае выданне, ён парой нават жартуе з прэс-сакратаркай Белага дома Кэролайн Левіт, што ўжо паведаміў журналістам важныя навіны, пра якія яна даведаецца толькі пасля іх публікацыі.

У матэрыяле таксама гаворыцца, што Трамп час ад часу пагаджаецца скараціць колькасць такіх кантактаў з прэсай, аднак пасля вяртаецца да звыклага стылю зносін.

Скандальныя заявы Трампа

Апошнім часам Дональд Трамп неаднаразова рабіў рэзкія заявы адносна вайны з Іранам, якія выклікалі шырокі рэзананс і крытыку. Яго рыторыка часта выходзіла за межы традыцыйнай дыпламатыі і выглядала як прамыя пагрозы.

У прыватнасці, ён заяўляў, што «можа загінуць цэлая цывілізацыя», калі Тэгеран не выканае патрабаванні ЗША, а таксама папярэджваў аб «пякельнай ночы» ў выпадку адмовы ад саступак. Паралельна Трамп дапускаў удары па інфраструктуры і нават казаў пра магчымасць знішчэння ўсіх электрастанцый Ірана.

Акрамя таго, ён рабіў супярэчлівыя заявы ў дачыненні да саюзнікаў, у прыватнасці пагражаў спыніць пастаўкі зброі Украіне, калі Еўропа не падтрымае яго ініцыятывы. Таксама Трамп заклікаў партнёраў самастойна ўзяць пад кантроль Армузскі праліў і заяўляў, што краіны мусяць «самі забіраць сваю нафту», фактычна дыстанцуючыся ад ролі ЗША.