СМІ: Германія і Францыя не змаглі прыйсці да пагаднення па праекце новага знішчальніка

• 19.04.2026, 18:20

Дзве краіны маюць патрэбу ў ваенных самалётах для розных задач.

Апошняя спроба Германіі і Францыі дасягнуць дамоўленасці па сумесным праекце знішчальніка новага пакалення FCAS скончылася няўдачай.

Пра гэта паведамляе Euractiv.

Нямецка-французскі праект па распрацоўцы знішчальніка наступнага пакалення і спадарожнай баявой сістэмы коштам 100 мільярдаў еўра «застрэў» ужо больш за год, паколькі інтарэсы Берліна і Парыжа ў гэтым пытанні ўсё больш разыходзяцца.

Пасля таго як палітычныя намаганні на міністэрскім узроўні апынуліся марнымі, абодва ўрады звярнуліся да галіновых гігантаў, каб урэгуляваць спрэчку паміж галоўным падрадчыкам праекта з боку Германіі Airbus Defence і французскім партнёрам Dassault Aviation.

Дуэт пасярэднікаў, якому было даручана вывесці сітуацыю з тупіка, не здолеў дасягнуць агульнай пазіцыі.

На пытанне Euractiv пра тое, як прасоўваецца працэс перамоваў, Airbus Defence і Dassault адказалі амаль аднолькава — «без каментарыяў».

Паведамляецца, што канцлер Германіі Фрыдрых Мерц да аўторка вырашыць, ці будзе прадоўжаная праграма стварэння будучага знішчальніка. У чацвер, 23 красавіка, ён павінен сустрэцца з прэзідэнтам Францыі Эмануэлем Макронам на нефармальным саміце лідараў ЕС на Кіпры.

У лютым Мерц публічна паставіў пад сумнеў мэтазгоднасць праекта знішчальніка новага пакалення FCAS на фоне пастаянных спрэчак з Францыяй з гэтай нагоды.

Францыя і Германія не змаглі ўрэгуляваць спрэчку па праекце FCAS да канца 2025 года.

Сярод разыходжанняў — тое, што дзве краіны маюць патрэбу ў ваенных самалётах для розных задач. Францыі патрэбныя самалёты, здольныя несці ядзерныя боегалоўкі і ўзаемадзейнічаць з яе авіяносцам, тады як Германія, якая не мае авіяносцаў, ужо пагадзілася набыць амерыканскія ваенныя самалёты F-35 для перавозкі ядзерных боегалоўкаў НАТА.