Схаваныя дыягназы Пуціна
- Вікторыя Вагнер
Можа ісці гаворка пра сур'ёзныя хваробы расійскага дыктатара.
Стан здароўя Пуціна — прадмет як нязменнай цікавасці, так і пастаянных спекуляцый. Яго медыцынскія паказчыкі з'яўляюцца важнымі фактарамі сусветнай палітыкі, таму варта ўлічваць іх бяспрыстрасна.
«Нязменныя лідары»
Афіцыйна ніякай негатыўнай інфармацыі пра стан здароўя расійскага дыктатара не абнародавалі. Хаваць такія звесткі ўласціва дыктатурам — інфармацыя пра стан здароўя папярэднікаў Пуціна прасачвалася ў медыйную прастору толькі праз гады і дзесяцігоддзі пасля іх смерці.
Сталін памёр у 74 гады ад інсульту. Леанід Брэжнеў — у 75. А ці ведалі вы, што Брэжнеў перажыў некалькі клінічных смерцяў? Адна з іх здарылася з ім у 1976‑м, пасля чаго ён ператварыўся ў хадзячы анекдот і канчаткова памёр у 1982 годзе. А да таго за яго знаходжаннем на гэтым свеце неўсыпна сачыла Чацвёртае галоўнае ўпраўленне пры Мінздароўі СССР — легендарная «Крэмлёўка» — і асабіста акадэмік Яўген Чазаў. Генсека кругласутачна суправаджала група ўрачоў-рэаніматолагаў. Яго загарадныя рэзідэнцыі і нават працоўны кабінет былі абсталяваныя найноўшым на той час рэанімацыйным абсталяваннем, а ў паездках у картэжы заўсёды ехаў спецыяльны рэанімабіль.
З часоў савецкай улады сусветная медыцына кардынальна змянілася, таму спадзявацца, што 73‑гадовы Пуцін набліжаецца да фіналу сваіх папярэднікаў, бессэнсоўна. Але любыя змены ў яго фізічным стане маюць велізарны ўплыў на сітуацыю ў свеце.
Схаваныя дыягназы
Аналізаваць рэальны стан здароўя расійскага дыктатара можна хіба што па знешніх прыкметах.
У выніку візуальнага назірання медыцынскія эксперты пачалі гаварыць пра «стэроідны твар». Візуальная апухласць, так званае «месяцападобнае аблічча», у медыцыне звычайна звязваюць з прыёмам глюкакартыкастэроідаў. Іх ужываюць пры лячэнні анкалогіі, хвароб нырак і моцных боляў у спіне, а таксама ў выпадках аўтаімунных парушэнняў.
Пабочныя эфекты, якія даюць глюкакартыкастэроіды, і якія назіральнікі адзначаюць у Пуціна:
«стэроідная ярасць» — празмерная агрэсіўнасць, раздражняльнасць і імпульсіўнасць у прыняцці рашэнняў;
аслабленне імунітэту (адсюль страх перад інфекцыямі, пра што сведчаць доўгія сталы і каранціны для наведвальнікаў) і таму падобнае.
Разам з тым варта ўлічваць, што адутлаватасць твару можа быць таксама вынікам касметычных працэдур або сардэчна-сасудзістых праблем.
Яшчэ ў студзені 2014 года амерыкана-брытанскі часопіс The Week паведаміў пра чуткі пра магчымы рак спіннога мозгу ў Пуціна. Дастаткова малады часопіс The Week не лічыцца «цяжкавагам» (як The Economist або Time), аднак яго чытаюць «людзі, якія прымаюць рашэнні».
У кастрычніку 2015 года ўжо амерыканскі таблоід The New York Post паведамляў, што Пуцін пакутуе на рак падстраўнікавай залозы — журналісты спасылаліся на нямецкага лекара, які яго лячыў.
Іншыя крыніцы кажуць пра іншыя віды анкалагічных захворванняў, якія могуць быць у Пуціна. Асабліва абмеркаванне такой інфармацыі ажывела пасля пачатку паўнамаштабнага ўварвання. У прыватнасці, штотыднёвік Newsweek у чэрвені 2022 года апублікаваў рэзанансны матэрыял пра тое, што ў красавіку 2022 года Пуцін прайшоў курс лячэння ад раку. Newsweek — адно з найстарэйшых і самых вядомых амерыканскіх выданняў, але ў апошнія гады яго абвінавачваюць у пагоні за сенсацыямі.
Брытанскія выданні, са спасылкай на справаздачы брытанскай разведкі MI6, меркавалі, што Пуцін можа быць сур'ёзна хворы, а на публічных мерапрыемствах часам з'яўляюцца яго двайнікі. Нямецкі Bild у аналагічных публікацыях спасылаўся на даныя нацыянальных спецслужбаў.
На пачатку 2023 года пра цяжкую хваробу дыктатара казаў і Начальнік Галоўнага ўпраўлення разведкі Міністэрства абароны Украіны Кірыл Буданаў.
Але, мяркуючы па ўсім, дадзеных разведак свету недастаткова для ўстанаўлення канчатковага дыягназу.
Куды больш падстаў па знешніх прыкметах казаць яшчэ пра адну хваробу дыктатара — Паркінсана. Здагадкі пра яе ўзніклі з-за назірання за маторыкай Пуціна. На многіх відэа заўважныя дрыжыкі рук і ног, хапанне за край стала або ненатуральныя рухі ступнямі. Таксама відэа зафіксавала «хаду стралка» — абмежаваную амплітуду рухаў правай рукі падчас хады. Гэта ранні прызнак паркінсанізму.
Мары пра вечнае жыццё
Падчас візіту Уладзіміра Пуціна ў Пекін у верасні 2025 года прыватную размову з Сі Цзіньпінам пра даўгалецце незапланавана зафіксавалі ўключаныя мікрафоны. І гэта не выпадковы small talk, бо Кітай упэўнена канкуруе з ЗША за лідарства ў сферы даследавання даўгалецця — дзякуючы адсутнасці жорсткіх этычных абмежаванняў, якія існуюць на Захадзе. А Расія, у фарватары Кітая, працуе над падаўжэннем жыцця аднаго канкрэтнага чалавека.
Даследаваннямі ў гэтым напрамку ў РФ займаецца старэйшая дачка Пуціна, эндакрынолаг Марыя Варанцова.
У 2024—2025 гадах у Расіі канчаткова аформіўся канкрэтны пералік тэхналогій, на якія дзяржава (адпаведна, асабіста Пуцін) робіць стаўку і за якімі пільна сочыць яго дачка:
Біёдрук і рэгенерацыя органаў. Тэхналогія прызначана не лячыць стары орган, а замяняць яго на новы, надрукаваны на 3D-прынтары з уласных клетак пацыента.
Рэдагаванне геному — тэхналогія, якая дазваляе ўносіць дакладныя змены непасрэдна ў ДНК жывых арганізмаў. У прыватнасці, яе можна выкарыстоўваць для выпраўлення генетычных памылак, якія назапашваюцца з узростам і прыводзяць да старэння або павышаюць схільнасць да раку.
Распрацоўка сэналітыкаў — прэпаратаў, якія выбарачна знішчаюць старэючыя клеткі.
Асобна ад генетычных даследаванняў вядзецца праца па стварэнні «лічбавай неўміручасці». Курчатаўскі інстытут распрацоўвае спосаб перанесці мозг у камп'ютар — на выпадак, калі не ўдасца выратаваць цела.
У пачатку 2025 года была запушчана маштабная дзяржаўная праграма РФ Новыя тэхналогіі захавання здароўя, абвешчаная як стратэгія дасягнення «тэхналагічнага суверэнітэту» ў медыцыне і распрацоўкі метадаў радыкальнага падаўжэння жыцця. Паводле амбіцыйных планаў ужо ў 2028 годзе ад яе чакаюць важкіх вынікаў. Ці можна лічыць простым супадзеннем, што да таго часу Пуціну будзе 75 гадоў?
Вікторыя Вагнер, NV