Беларусы і шведы распавялі ў Вільнюсе пра свабоду, салідарнасць і смеласць

• 2.04.2026, 16:32

Спектакль пра праблемы, з якімі сутыкнуліся нашы суайчыннікі, паказалі на літоўскай сцэне.

Тэатральная рэзідэнцыя, створаная ў межах міжнароднай праграмы Creative Communities Acceleration Program (CCAP) у Вільнюсе, стала прасторай для інтэнсіўнай сумеснай працы ўдзельнікаў з Беларусі і Швецыі. На працягу тыдня яны даследавалі, як праз тэатр, цела, голас, асабістыя гісторыі і калектыўную творчасць можна гаварыць пра складаныя тэмы — ад страты і салідарнасці да свабоды, адказнасці і грамадзянскай смеласці.

«Праект надаў асаблівую ўвагу асэнсаванню беларускай сітуацыі — кантэксту, у якім мастацтва становіцца не толькі формай самавыяўлення, але і спосабам захавання годнасці, памяці і ўнутранай свабоды, — распавялі сайту Charter97.org удзельнікі мерапрыемства. — У працэсе творчай працы мы імкнуліся знайсці агульную мову для абмеркавання праблем, што стаяць перад грамадствам: крызісу даверу, адсутнасці дыялогу і ўразлівасці дэмакратычных каштоўнасцяў.

Фінальны спектакль стаў вынікам гэтай калектыўнай працы. Жывы, эксперыментальны і эмацыйны, ён не прапаноўваў гатовых адказаў, а ствараў прастору для суперажывання, разважання і ўключэння. Праз асабістыя гісторыі спектакль закранаў тэмы, вельмі актуальныя для Беларусі, не згадваючы іх наўпрост, што асабліва адзначылі гледачы пасля паказу».

Мерапрыемства наведалі больш за 60 гледачоў.