У Крыме разбілася вярхушка Паўночнага флоту РФ

• 2.04.2026, 16:56

У катастрофе Ан-26 загінулі расійскі генерал і шэсць афіцэраў штаба.

Тэлеграм-канал «Досье шпиона» паведаміў, што на борце самалёта Ан-26, які 31 сакавіка разбіўся ў акупаваным расіянамі Крыме, сярод іншых загінулых быў і генерал.

Паводле інфармацыі тэлеграм-канала, сярод 29 чалавек (23 пасажыры і 6 членаў экіпажа), якія загінулі ў авіякатастрофе Ан-26 31.03.2026, быў генерал-лейтэнант Аляксандр Атрошчанка, камандзір змешанага авіяцыйнага корпуса Паўночнага флоту, былы камандуючы 45‑й арміяй ВПС і СПА Паўночнага флоту.

Акрамя яго, загінулі таксама 6 афіцэраў штаба Паўночнага флоту (в/ч 45625, Севераморск).

Інцыдэнт з самалётам Ан-26 над акупаваным Крымам адбыўся 31 сакавіка каля 18:00 па маскоўскім часе. Як сцвярджаюць у ведамстве, «паражальнага ўздзеяння па самалёце не было», а папярэдняй прычынай аварыі называецца тэхнічная няспраўнасць.

Мінабароны афіцыйна паведаміла, што загінулі 6 членаў экіпажа і 23 пасажыры.

Паводле сведчання крыніцы агенцтва «Інтэрфакс», самалёт урэзаўся ў скалу.