Саудаўцы запусцілі новы гандлёвы шлях у абыход Армузскага праліва

• 2.04.2026, 18:16

Нечаканая альтэрнатыва.

Саудаўская Аравія запусціла грузавую чыгунку працягласцю больш за 1700 км у якасці альтэрнатывы Армузскаму праліву. Яна ідзе ад порта Абдулазіз у Персідскім заліве да мяжы з Іарданіяй, адкуль тавары будуць перавозіцца аўтатранспартам да Чырвонага мора, піша Railway Gazette International.

Цягнікі, кожны з якіх зможа перавозіць больш за 400 кантэйнераў, будуць курсіраваць у абодва бакі - гэта дазволіць краіне як працягваць экспарт сваёй прадукцыі на сусветныя рынкі, так і ўвозіць замежныя тавары.

Чыгуначны шлях будзе ўдвая больш эфектыўны за звычайны аўтамабільны. Акрамя таго, ён не будзе ствараць дадатковага руху на дарогах краіны.

У той жа час у Іарданіі тавары будуць працягваць свой шлях па дарогах, бо чыгуначная сетка краіны не прыстасаваная для перавозкі кантэйнерных грузаў.