21-гадовы ўнук Лукашэнкі пабудуе цэх за дзяржкрэдыт на ільготных умовах

• 2.04.2026, 18:24

Ён размесціцца ў «аршанскім афшоры».

Журналісты-расследавальнікі «Бюро» высветлілі, што кампанія ўнука Аляксандра Лукашэнкі «Сезон упакоўкі» трапіла ў інвестыцыйную дзяржаўную праграму «Рэгіянальная ініцыятыва». Яна атрымае дзяржкрэдыт на асаблівых умовах.

«Сезон упакоўкі» ўключылі ў дзяржпраграму 6 сакавіка гэтага года. Плануецца, што кампанія ўнука Лукашэнкі пабудуе вытворча-складскі цэх па вырабе тары з гафраванага кардону на 110 працоўных месцаў.

Ён размесціцца ў асаблівай эканамічнай зоне «Брэміна — Орша» (у народзе яе яшчэ называюць «аршанскі афшор»). Кампаніі, зарэгістраваныя там, не плацяць ПДВ і мытныя пошліны на ўвоз матэрыялаў, камплектуючых і сыравіны пад інвестпраект.

Дзяржпраграма «Рэгіянальная ініцыятыва» прадугледжвае выдзяленне крэдыту на суму да 30 мільёнаў беларускіх рублёў. Тэрмін — да 10 гадоў. Стаўка — 7% у першыя тры гады, а потым паводле схемы «стаўка рэфінансавання плюс тры працэнтныя пункты». Для параўнання: банкі выдаюць камерцыйныя крэдыты для бізнесу пад 11–14% гадавых. Выдаваць іх будуць «Беларусбанк», «Белінвестбанк», «Белаграпрамбанк» і «Банк развіцця Рэспублікі Беларусь».

Нагадаем, 20% «Сезону ўпакоўкі» належаць 21-гадоваму Аляксандру Лукашэнку — малодшаму. Астатнімі 80% валодае фірма «Марскія сезоны», якую кантралюе бізнесвумен Людміла Неронская — блізкая сяброўка Віктара Лукашэнкі і Ліліі Лукашэнкі (гэта бацькі Аляксандра Лукашэнкі — малодшага).

Акрамя таго, у «Марскіх сезонах» таксама працуе зяць Віктара Лукашэнкі і Ліліі Лукашэнкі — Дзмітрый Дзятлоў і сват (муж роднай сястры Ліліі Лукашэнкі) — Аляксандр Гарусаў.

Раней даследчыкі паведамлялі, што беларускія ўлады засакрэцілі даныя фірмаў, звязаных з Людмілай Неронскай, у тым ліку і «Сезону ўпакоўкі».