Rheinmetall пачаў серыйную вытворчасць марскіх дронаў

• 21.04.2026, 1:11

Нямецкі канцэрн плануе штогод выпускаць каля 200 такіх беспілотных катэраў.

Нямецкі абаронны канцэрн Rheinmetall пачаў серыйную вытворчасць беспілотных надводных катэраў у порце нямецкага Гамбурга. Пра гэта гаворыцца ў паведамленні кампаніі на яе сайце.

Спачатку на верфі Blohm+Voss плануецца штогод выпускаць каля 200 такіх беспілотных катэраў. Аднак у далейшым аб’ёмы вытворчасці могуць быць павялічаныя да 1000 адзінак у год.

Беспілотныя катэры паспяхова выкарыстоўваюцца Украінай для абароны ад расійскага ўварвання.

Rheinmetall вырабляе гэтыя надводныя судны ў партнёрстве з брытанскай кампаніяй Kraken Technology Group.

Катэр K3 Scout можа выкарыстоўвацца ў ваенных або грамадзянскіх мэтах. Ён кіруецца дыстанцыйна і, як мяркуецца, у будучыні зможа працаваць у аўтаномным рэжыме.